Ұлттық банк пен ЕАДБ 200 млрд теңге қаржы тартуға мүмкіндік беретін келісімге қол қойды

ҚР Премьер-министрі Асқар Маминнің төрағалығымен бейнеконференция байланысы режимінде Еуразиялық даму банкі (ЕАДБ) Кеңесінің отырысы өтті, деп хабарлайды Премьер-министрдің баспасөз қызметі.

Кеңес Еуразиялық даму банкінің 2019 жылғы жұмысын қорытындылады – ЕАДБ қазіргі инвестициялық портфелі $4,3 млрд дейін 25,6%-ға ұлғайды. Баланстық портфель 31%-ға, яғни $2,8 млрд-қа дейін өсті. Портфелінде ең көп үлесі бар елдер — Ресей (45,7%) және Қазақстан (40,1%).

2019 жылдың қорытындысы бойынша ағымдағы инвестициялық портфельдің салалық құрылымы өзгерген жоқ – ең үлкен үлес энергетикадағы (21,1%), көліктегі (18,9%), қаржы секторындағы (18,7%) жобаларға тиесілі.

 «2019 жылы жалпы сомасы $1,3 млрд болатын 27 жаңа жоба бойынша келісімге қол қойылды. Банк барлық қатысушы мемлекеттерде өзінің қатысуын белсенді түрде дамытып, қолданыстағы стратегияны ескере отырып, ұлттық даму жобалары мен елеулі интеграциялық тиімділігі бар жобаларды қаржыландыруды жүзеге асырды»,- делінген хабарламада.

Банк портфеліндегі интеграциялық жобалардың үлесі мақсатты мәннен асып, 54,4%-ға жетті. Банктің қарыз алуының жиынтық көлемі $2,6 млрд құрады. 2019 жылы ЕАДБ жалпы сомасы 80 млрд теңгеге бес облигация шығарылымын, жалпы сомасы 23 млрд рубльге бес облигация шығарылымын орналастырды, сондай-ақ $201 млн еурооблигациялар шығарылымын екінші рет орналастырды.

 «Инвестициялық портфельдің айтарлықтай өсуін ескере отырып, ЕАДБ оның сапасын тиісті деңгейде сақтай алды. Баланстық портфельдегі провизиялар үлесі 2019 жылы 3,2%-дан 2,4%-ға дейін төмендеді. 2019 жылдың қорытындысы бойынша банктің кірісі $68,9 млн құрады. Капиталдың табыстылығы – 3,8%»,- делінген хабарламада.

Қазақстанда инвестициялық қызметті дамыту үшін Қазақстанның Ұлттық банкімен ЕАДБ-ге 200 млрд теңге лимитімен қаржы тартуға мүмкіндік беретін келісімге қол қоюдың маңызы зор.

 Халықаралық рейтингтік агенттіктер ЕАДБ қаржылық тұрақтылығына жоғары баға берді: Standard&Poor 's банктің рейтингін ВВВ дейін көтерді, Moody' s агенттігі Baa1 растады, ал Fitch агенттігі BBB+ рейтингін берді.