Еліміздің үш облысында битум қоймалары салынады

Көлік министрлігі Қызылорда, Ұлытау және Ақтөбе облыстарында битум қоймаларын салуды жоспарлап отыр, деп хабарлайды Azattyq Rýhy.

Көлік министрі Марат Қарабаевтың айтуынша, биыл жол салу үшін 1,4 млн тонна битум қажет, оның ішінде республикалық жолдарға – 545 мың тонна, жергілікті жолдарға – 880 мың тонна.

«Құрылыс маусымы қызған кезінде битум тапшылығын болдырмау үшін мердігер ұйымдармен жасалған шарттарға битумды алдын ала дайындау үшін сақтау қоймаларының болуы туралы талап енгізілді. Сонымен қатар, қысқы кезеңде алдын ала дайындық үшін аванстық төлемдер төленуде. Құрылыс маусымы басталғанға дейін 347,3 мың тонна битум дайындалды, оның ішінде 152 мың тоннасы – қысқы кезеңде. Биыл CaspiBitum зауытын жаңғырту жұмысы аяқталып, өндіріс көлемі жылына 750 мың тоннаға дейін ұлғайтылды. Битум өндірісінің артып жатқанын ескеріп Қызылорда, Ұлытау және Ақтөбе облыстарында жалпы көлемі 100 мың тоннадан асатын битум қоймаларын салу жоспарланып отыр», - деді Қарабаев Сенатта өткен Үкімет сағатында.

Сонымен қатар, Мәжілісте қаралып жатқан «Автомобиль жолдары саласын реформалау туралы» заң жобасы аясында битум бөлу Көлік министрлігінің құзыретіне өтеді. Заң жобасы осы жылдың екінші жартысында Сенатқа түседі.