Qazaq Air-дің 38,4 млрд теңге қарызын вьетнамдық компания жабатын болды
Қазақстан тарапы осындай талап қойған
Qazaq Air әуе компаниясын сатып алғалы жатқан вьетнамдық инвестор – SOVICO Group компаниясы 38,4 млрд теңге берешекті жауып, 20 ұшақ сатып алатын болды. Шетелдік инвесторға қойылған талаптар туралы «Самұрық-Қазына» ҰӘҚ» АҚ басқарма мүшесі – Стратегия және активтерді басқару жөніндегі тең басқарушы директор Елжас Отыншиев мәлімдеді, деп хабарлайды Azattyq Rýhy.
Оның айтуынша, Qazaq Air-дегі үлесті сату мәмілесінің шарттарын анықтау бойынша негізгі келіссөздер аяқталған.
«2024 жылғы 20 желтоқсанда экономиканы жаңғырту жөніндегі мемлекеттік комиссияның отырысында негізгі шарттар мақұлданды. Жыл соңына дейін «Самұрық-Қазына» директорлар кеңесі мен Үкімет тарапынан оң шешім қабылданады деп күтіп отырмыз», - деді Отыншиев Мәжілісте өткен үкімет сағатында.
Қазақстан вьетнамдық инвесторға екі талап қойған.
«Біріншісі – 2044 жылдың соңына дейін 38,4 миллиард теңге қарызды жабу. Ал екіншісі – бес жыл ішінде Boing немесе Airbus-тан 20 ұшақ сатып алу. Ал инвесторлар тарапынан осы мерзімді екі жылға созу мүмкіндігі қарастырылған. Осы талаптардың орындалуын қамтамасыз ету үшін вьетнамдық SOVICO компаниясы кепілдік ұсынуға дайын», - дейді Отыншиев.
