Стати ісі: Қазақстан Ұлттық қордың активтерін өз иелігіне қайтарды
Дауды реттеу туралы келісімнің шарттары құпия болып қалады
Қазақстанның Ұлттық банкі Стати ісі бойынша Швецияда болған Ұлттық қор активтерін өз иелігіне қайтарды, деп хабарлайды Azattyq Rýhy.
Осыған дейін Әділет министрлігі Қазақстан Үкіметі, Ұлттық банкі және Стати тараптары Қазақстандағы мұнай-газ активтері туралы ұзақ мерзімді дауды реттеу процесін сәтті аяқтағанын мәлімдеген. Ал бүгін Ұлттық банк осы дауды түпкілікті реттеу нәтижесінде Ұлттық қордың активтерін өз иелігіне қайтарғанын сүйіншіледі.
«Дауды реттеу нәтижесінде Қазақстан Ұлттық банкі Стати тараптарының Қазақстан Республикасы Ұлттық қорының активтеріне қойған талаптарынан бас тартуына және Швецияда қамтамасыз ету шараларының ықпалында болған Қазақстан Республикасы Ұлттық қорының активтерін өз иелігіне қайтаруға қол жеткізді», - делінген хабарламада.
Бұл Ұлттық қордың ұзақ мерзімді кірістілігін жақсарту үшін жағдай жасауға ықпал ететін операциялық икемділікті арттыруға және әлеуетті инвестициялық серіктестердің барынша кең ауқымын тартуға жаңа мүмкіндіктер ашады, деп санайды Ұлттық банк.
Дауды түпкілікті реттеу туралы келісімнің нақты шарттары құпия болып қалмақ.
Әділет министрі Азамат Есқараев бұл процеске республикалық бюджеттен қаражат жұмсалмағанын атап өткен болатын.
