Пандемия кесірі: «ҚазМұнайГаздың» табысы 3 есеге азайып кетті

«ҚазМұнайГаз» ҰК АҚ-ның 1-ші тоқсандағы таза пайдасы 100 млрд теңге болады. Былтыр 1 тоқсанда аталған көрсеткіш 309 млрд теңгені құраған. Бұл туралы компанияның  Басқарма төрағасының орынбасары Дәурен Қарабаев мәлімдеді. Ал жалпы түсімдер 1,4 трлн теңгені құрады.

«Бұл былтырғы жылмен салыстырғанда 21%-ға төмен. Ол кезде 1,7 трлн болған. Айтып отырғанымыз - амортизациялық пайызды, табыс салығын алып тастамағандағы операциялық көрсеткіш. Салықтық шығындарымыз 270 млрд теңге болды, былтыр 486 млрд теңге еді. Операциялық активтер өткен жылы 267 млрд теңге болса, биыл 218 млрд теңге. Біздің бірлескен өнеркәсіп орындарынан алатын пайдамыз қысқарып, 53 млрд теңгені құрады. 2019 жылы 219 млрд еді. Бұл – мұнай бағасының арзандауы мен теңге бағамының өзгеруінің әсері», - деп айтты онлайн-брифингте Д.Қарабаев.

Оның сөзінше, коронавирус пандемиясы отандық мұнай өңдеу зауыттарының жұмысын баяулатқан.

«Мұнай өңдеу отандық мұнай өңдеу зауыттарында бірінші тоқсанда 3,3 млн тоннаны құрап, былтырғы көрсеткіштен сәл жоғары болды. Дегенмен ғаламдық пандемия өңдеу секторына да үлкен әсерін тигізді. Сондықтан сәуірде мұнай өнімдеріне деген сұраныс төмендеп кетті. Қазір Атырау зауыты өз өндірістік қуатының 80%-ымен, Шымкенттегі зауыт 61%-ымен ғана жұмыс істеп жатыр. Ал Павлодар зауытында жөндеу жұмыстары жүруде», - деді бұл туралы төраға орынбасары.

1 тоқсанда «Қазмұнайгаз» компаниялар тобы 5,9 млн тонна мұнай өндіріп, оның 4 млн тоннасы немесе 69%ы экспортқа жіберілген. ОПЕК+ келісіміне сәйкес енді бұл көрсеткіш те төмендейді.

«Бізде әзірге мұнай жеткізу көлемін қысқарту жоспары жоқ. Дегенмен, мұнай бағасының арзандауы мен ОПЕК+ келісіміне байланысты екінші тоқсанда мұнай өндіру көлемі азаяды. Келісімге сәйкес, Қазақстан өндіруді тәулігіне 360 мың баррельге азайтуға шешім қабылдады. Министрлік барлық мұнай компанияларына бұл қысқарту көлемін әділ бөледі деп сенеміз», - деді Дәурен Қарабаев.

Еске салсақ, жыл басында Brent маркалы мұнай бағасы $50 болса, сәуірде $18-да құлап кетті. «Қазмұнайгазға» қарасты және бірлескен өнеркәсіп орындары «минусқа» жұмыс істеді. Енді компания өзінің шығындарын биыл 127,3 млрд теңгеге қысқартпақ.

Абай Сейфулла, Нұр-Сұлтан