Талдықорғанда тәулігіне 500 тонна майлы дақыл өңдейтін зауыт ашылды

Талдықорған қаласының аумағынан ашылып жатқан индустриалды аймақта тәулігіне 500 тонна майлы дақыл өңдейтін жаңа зауыт ашылды. Өндіріске жалпы 5,8 млрд теңге шамасында инвестиция құйылған, деп хабарлайды Егемен Қазақстан газеті.

Жаңа зауыттың ашылуына Алматы облысының әкімі Амандық Баталов, мемлекет және қоғам қайраткері, Халық қаһарманы, Еңбек Ері Сергей Терещенко және белгілі кәсіпкер Темірхан Досмұхамбетов қатысты.

«Бүгін біз бірлесіп «Талдықорған» индустриалды аймағында майлы дақылдар өңдеп, өсімдік майын шығаратын «Жетісу-Мажико» зауытын іске қосып отырмыз. Инвесторларға зор алғыс айтамын. Біз өз тарапымыздан индустриалды аймақ құрып, оны қажетті инфрақұрылыммен қамтамасыз еттік. Жалпы мемлекет қолдауының және қабылданған шаралардың арқасында өткен жылы Алматы облысының өнеркәсіп өнімінің жалпы көлемі 1 триллион теңгеге жуықтады, - деді зауыттың ашылуында сөз алған облыс әкімі Амандық Баталов.

«Жетісу-Мажико» агрокешенінің бұл өндірісіне  4,4  млрд теңге жұмсалыпты. Бірінші кезеңде 50 жұмыс орны ашылды. Алдағы уақытта кәсіпорын толық қуатына қосылып, зауыт іргесі кеңейгесін 500 адамға тұрақты кәсіп табылмақ. Қазір іске қосылған зауыт ыстықтай сығымдау тәсілімен өсімдік майын шығарады. Ол тәулігіне 500 тонна рапс және  400 тонна күнбағыс өңдейді, соның нәтижесінде өсімдік майы мен жом өндіріледі. Өндіріс шикізатпен 100 процент қамтылған, неміс өндірушілерінің құрал-жабдықтары орнатылған, сол арқылы алынатын өнім сапасын жақсарту үшін майлы дақыл тұқымдарын экструзионды технологиямен өңдеу қолданылады. Дайын өнім жергілікті нарыққа шығарылады, сонымен қатар таяу болашақта Қытайға экспортталады.

Жалпы, жақын арада Талдықорған қаласында жалпы құны 22,9 млрд теңге болатын тағы 3 ірі инвестициялық жоба жүзеге аспақшы. Нәтижесінде 528 адам жұмыспен қамтылады деген жоспар бар.