ШұғылКоронавирусты жұқтыру қарқынында өсім байқалды

Қазақстанда қайталама нарықтағы тұрғын үй бағасы арзандауы мүмкін

Сарапшылардың айтуынша, қайталама тұрғын үйдің қазіргі құны нақты құнынан жоғары

Фото: ашық дереккөзден

Қазақстанда қайталама тұрғын үй жыл соңына қарай 10%-ға дейін арзандауы мүмкін. LS агентттігіне осындай болжамды Қазақстанның жылжымайтын мүлік федерациясының басшысы Ермек Мүсірепов мәлімдеді.

Ол қазіргі уақытта абаттандырылған қайталама тұрғын үй бағасы шамамен 20%-ға көтерілгенін жеткізді. Бұл жылжымайтын мүлікті сатып алу үшін зейнетақы жинақтарын пайдалану мүмкіндігіне байланысты басталған дүрлікпеге байланысты дейді ол.

«Дүрлігудің салдарынан сұраныс та төмендеді. Сондай-ақ, қайталама тұрғын үй ипотекалық бағдарламаларының қысқаруына байланысты осы нарықта тұрғын үй сатып алу мүмкіндігі аз болады. Халықтың ағымдағы бағамен пәтер сатып алуға жеткілікті қаражаты болмауының нәтижесінде қайталама тұрғын үй біртіндеп 10%-ға дейін арзандайтын болады. Негізінде жыл соңына қарай бағалар тұрақталуы тиіс», - деп атап өтті Мүсірепов.

Оның сөзінше: егер бастапқы нарықта тұрғын үйдің 90%-ы ипотека арқылы сатып алынса, екінші нарықта – 60%. Қалғаны – адамдар өздерінің тұрғын үй жағдайларын жақсарту үшін пайдаланатын бос қаражат.

Сонымен қатар, Алматы және Нұр-Сұлтан сияқты ірі қалаларда жаңа және ескі пәтерлер бірдей баға деңгейінде тұр. Орналасқан жеріне байланысты айырмашылық 5-10% болуы мүмкін. Кейбір жағдайларда қайталама тұрғын үй қымбатырақ сатылуда.

Бастапқы нарық туралы айта келе, Мүсірепов егер I және II санаттағы (элит және бизнес-класс) тұрғын үй бағасы өссе, онда олардың едәуір бөлігін импорттық құрылыс материалдары құрайды, онда ішінара III және IV санаттағы (комфорт және экономкласс) үйлер құны да аздап тұрақталуы мүмкін екенін атап өтті.

Себебі, мұндай тұрғын үйді сатып алатын адамдарда санаты мен құнына сәйкес келмейтін жылжымайтын мүлікті сатып алу мүмкіндігі болмайды.

Бұған дейін Қазақстан құрылысшылар одағының басшысы Талғат Ерғалиев келесі жылы жаңа тұрғын үй күрт қымбаттайтынын болжаған болатын. Сонымен қатар, тамыз айында Қазақстанда бастапқы тұрғын үй құны қайтадан өсе бастады. Қазіргі уақытта елде жаңа пәтерлер бір шаршы метр үшін орта есеппен 343,8 мың теңге, абаттандырылған қайталама тұрғын үй – бір шаршы метр үшін 272,8 мың теңге.