Қазақстанда жұмыртқа бағасының қымбаттауы құс тұмауымен байланысты ма?

Әлеуметтік маңызы бар азық-түлік тауарларының бағасы жыл басынан бері 5,4 пайызға қымбаттаған. Бұл туралы Сауда және интеграция министрлігі Ішкі сауда департаменті директорының орынбасары Ерлан Ешназаров ОКҚ-да өткен брифингте мәлімдеді.

Мамыр мен қыркүйек айлары арасында баға 0,1 пайызға төмендеген. Дегенмен, қазан айында тұрақсыздық қайта байқалған.  

Әлеуметтік маңызы бар азық-түлік тауар бағасының қатты өсімі Павлодар (11,1%) және Нұр-Сұлтан (9,3%) қалаларында тіркелген. Ең төменгі көрсеткіш Алматы (3,8%) мен Қызылорда (4,5%) қалаларында белгіленген.

Қазан айының басындағы бағаның шарықтауы әсіресе жұмыртқа (6,9%), қант (4%) және күнбағыс майы (1,6%) өнімдерінен байқалады.

«Жұмыртқаның қазіргі уақыттағы орташа бағасы 314 теңгені құрайды. Бұл өткен жылдың сәйкес кезеңімен салыстырғанда 15,4% жоғары. Ал қанттың қымбаттауы елдегі қант өндірісінің төмендеуіне және Ресейдегі қант бағасының өсуіне байланысты болып отыр. Күнбағыс майы құнының өсуі елдегі осы бағыттағы егістік алаңдарының және импорт көлемінің азаюына байланысты болды» - деді Ерлан Ешназаров. 

Сондай-ақ министрлік өкілі қазір елімізде бидай бағасының өсімі бар екенін айтты. Бұл ұн, нан және ет өнімдерінің қымбаттауына әкелуі мүмкін.

Әсел Оршыбекова, Нұр-Сұлтан