«Сұр тізім»: Руслан Дәленов Қазақстанның ЕАЭО-ға тауарлар экспорттау кезіндегі проблемаларын атады

Ұлттық экономика министрі Ресейдегі құн салығының жоғары екенін айтты

Ұлттық экономика министрі Руслан Дәленов Еуразиялық экономикалық одағына мүше елдерге тауарлар экспорттау кезінде кездесетін проблемаларды атады, деп хабарлайды Azattyq Rýhy тілшісі.

Сенат отырысында депутат Дәурен Әділбеков «Бізді тауарларды әкелу алаңдатады. ЕАЭО-да сауда-экономикалық өзара қарым-қатынастар бойынша қайта қаралуы тиіс мәселелер бар ма?» деп сұрады.
Руслан Дәленов мұндай проблеманың бар екенін айтты және оны «сұр тізім» деп атаймыз деді.

«Бұл тізімге алкогольді өнімдер, акцизді өнімдер, антидемпингті салықты тергеу, бәсекеге қабілетті ұсыну мәселелері кіреді. Оның бәрін дұрыстап зерттеп, қарастыру керек. Оған қатысты қиындықтар бұрыннан бар. Тағы бірі – мемлекеттік сатып алу, мемлекеттік сатып алуға қолжетімділік, әртүрлі ақпараттық жүйелер мен цифрлық қолтаңбалар. Мұның бәрі - бәсекеге қабілеттілік мәселесі. Оның бәрі Еуразия экономикалық комиссияда қаралып жатыр. ҚҚС бойынша ставка әртүрлі. Ресейдегі ҚҚС-тің жоғары ставкасы менің ойымша, экспортты ынталандырмайды – басқа елдерден тауардың кіріп кетпеуін қадағалайды», - деді Руслан Дәленов Парламент Сенатының отырысында.

Руслан Дәленов Ресейдің кез келген тауарды шекарада 20% қосымша құн салығымен қабылдайтынын айтты. Ал Қазақстанда импорттық тауар бойынша бұл ставка – 12%.

«Бұл тұрғыда ставкасы жоғары мемлекетте басымдық болуы мүмкін. Екінші жағынан, экспорт кезінде экспорт туралы расталатын құжат алу қиын, яғни нөлдік ставканы пайдалану күрделі. Егер кәсіпорын шағын болса, Қазақстандағы контр-серіктес тауарды РФ-дан алып келе жатқанын растауы керек. Ресейлік экспортер үшін нөлдік ставканы пайдалану әрдайым сәтті бола бермейді. Сол себепті олардың тауары бойынша ставка 20 пайыз болып қала береді», - деді министр.

Руслан Дәленов Қазақстандағы 12 пайыздық ставка экспортқа өнімді шығаруға жол ашатынын атап өтті.