Пандемияға байланысты Қазақстан 1,6 трлн теңге мұнай ақшасын жоғалтты

Пандемияға байланысты Қазақстанның мұнай саласындағы табысы 46%-ға төмендеді, деп хабарлайды Azattyq Rýhy тілшісі LS-ке сілтеме жасап.

Премьер-Министрдің бірінші орынбасары Әлихан Смайылов пандемияға байланысты елдің қанша жоғалғанын айтты.

«Мұнай саласына келетін болсақ, ағымдағы жылдың сегіз айының қорытындысы бойынша өткен жылмен салыстырғанда кірістер 46%–ға немесе 1,6 трлн теңгеге төмендеді», - деді ол.

Сонымен қатар, мұнай экспортынан кедендік баж салығы өткен жылмен салыстырғанда 350 млрд теңгеге қысқарды, деп толықтырды Смайылов.

«Жыл соңына дейін біз мұнай бағасын барреліне $20 деңгейінде жоспарладық. Сондықтан біз мұнай секторынан қандай да бір түсімді жоспарламаймыз. Келесі жылы біз мұнай бағасы бұл мөлшерден біршама жоғары болады деп жоспарлап отырмыз», – деп атап өтті вице-премьер.

Ол бүгінде Үкімет экономиканы қалпына келтіру бойынша кешенді жоспарды жүзеге асырып жатқанын еске салды. Тиісінше, келесі жылы Үкімет мұнай табыстарына сүйенбей, шикізаттық емес сектордағы салық базасын ұлғайту бойынша жұмыс істей бастайды, деп түйіндеді ол.

Естеріңізге сала кетейік, «ҚазМұнайГаз» ұлттық компаниясының таза пайдасы 2020 жылдың І жартыжылдығында өткен жылдың сәйкес кезеңімен салыстырғанда 96,7% - ға төмендеді.