«Баварияның» жас таланты тобығынан ауыр жарақат алды (ВИДЕО)

Мюнхендік «Бавария» клубының жартылай қорғаушысы Джамал Мусиала Францияның ПСЖ командасына қарсы клубтар арасындағы әлем чемпионатының ширек финалдық матчында бірінші таймның соңында ауыр жарақат алды, деп хабарлайды Azattyq Rýhy.

Кездесу АҚШ-тың Атланта қаласында өтті және француз командасының жеңісімен (2:0) аяқталды.

Бірінші тайм 0:0 есебімен тең аяқталды, алайда матч ауыр жағдаймен есте қалды: 22 жастағы Мусиала ПСЖ қақпашысы Джанлуиджи Доннаруммамен соқтығысқаннан кейін тобығынан ауыр жарақат алды. Осы жағдайдан кейін Доннарумма киім ауыстыратын бөлмеге кетіп бара жатып, көз жасын тия алмады.

Видеодан Мусиаланың тобығы Доннарумманың денесінің астында қалып, аяғы қайырылып кеткені көрінеді. Доннарумма шок күйінде көгалға құлап түсті, ал Мусиаланы зембілмен алып кетті.

Клуб әзірге жарақаттың нақты түрі туралы ресми ақпарат берген жоқ, алайда сарапшылардың пікірінше, шабуылшы клубтар арасындағы әлем чемпионатының қалған бөлігін ғана емес, жаңа маусымның да едәуір бөлігін де өткізіп алуы мүмкін. Оның орнына алаңға Серж Гнабри шықты.

78-минутта француз клубының шабуылшысы Дезире Дуэ есеп ашты. 82-минутта ПСЖ ойыншысы Вильям Пачо алаңнан қуылды, ал 92-минутта Лукас Эрнандес қызыл қағаз алды. Саны басым болғанына қарамастан, «Бавария» 96-минутта екінші гол жіберіп алды. Бұл сәтті Усман Дембеле пайдаланып кетті.

Енді ПСЖ жартылай финалда мадридтік «Реал» мен «Боруссия» арасындағы жұптың жеңімпазымен кездеседі. Бұл матч бүгін Ист-Ратерфорд қаласында өтеді.