Барменқұловтың орнына футбол федерациясына кім келеді – министр жауабы
Барлық кандидат бойынша толық талдау жасалады, дейді министр
Туризм және спорт министрі Ербол Мырзабосынов Қазақстан футбол федерациясын Қазақстан азаматы басқаратынын, ал федерация құрамына шетелдік мамандар тартылуы мүмкін екенін айтты, деп хабарлайды Azattyq Rýhy.
Министр футбол федерациясы атқарушы комитеті бар қоғамдық бірлестік екенін атап өтті. Айтуынша, қазір федерацияның жаңа басшысын таңдау үшін қажетті рәсімдер жүріп жатыр, қорытынды конференция бір айдан кейін өтеді.
«Кандидаттар бойынша әзірге ақпарат жоқ. Қандай жағдай болса да, барлық кандидат бойынша толық талдау жасалады. Біз өз тарапымыздан үміткерлерді іріктеуге қатысамыз. Лайықты адамдар жоқ емес, бар. Бұл жерде федерация басшылығы ғана емес, спорт менеджлерінен бастап тұтас команда жасақталуы тиіс. Футболды дамытуға атсалысатын шетелдік мамандарды тарту мүмкіндігі туралы айтып өтпеске болмайды», - дейді Мырзабосынов Мәжіліс кулуарында.
Министр федерация президенті Қазақстан азаматы болатынына сендірді, бірақ бірлестікке шетелдік менеджерлер мен мамандар да қажет болуы мүмкін.
Естеріңізге салайық, өткен аптада Қазақстан футбол федерациясының президенті Әділет Барменқұлов өз еркімен қызметінен кеткені хабарланды. Ол федерацияны 2022 жылдың ақпанынан бері басқарған.
