Батысқазақстандық жас спортшы Азия Кубогын жеңіп алды

Ақтау қаласында өткен дзюдодан Азия Кубогы халықаралық жарысында батысқазақстандық спортшы Аңсарбек Ғайнуллин 81 келі салмақ дәрежесінде барлық қарсыластарын ұтып, чемпион атанды, деп хабарлайды Azattyq Rýhy тілшісі.    

Мемлекет басшысы халыққа арнаған биылғы жолдауында бұқаралық спортқа, оның ішінде жасөспірімдер спортына көп көңіл бөлу керек екенін айтты. Бұл өте қуантарлық жәйт. Спорт саласына енді келіп, енді айналысып жатқан жастар үшін үлкен мүмкіндік. Болашақта облысымыздың, еліміздің  атын әлемге әйгілі ететіндер де дәл осы жастар.

Спортқа жастайынан өз қызығушылығымен келген Аңсарбек бүгінде биік белестерді бағындырып үлгерген спорт шебері. Спортшының басты мақсаты олимпиада ойындарында жеңіске жетіп, әлем алдында қазақ Туын көкке көтеріп, Әнұранын шырқатсам дейді. Сол арманына жету жолында қаншалықты еңбектеніп жатқаны туралы аз-кем тілдескен едік.

Аңсарбек  1998 жылдың қаңтарында Батыс Қазақстан облысы, Қазталов ауданы, Жалпақтал ауылында дүниеге келген. Тоғыз жасынан бастап Орал қаласындағы №45 орта мектепте спорттың күрес түрімен айналыса бастаған бүлдіршінді әкесі Асхат Әбуов қолынан жетектеп дзюдо күресіне береді. Аңсарбектің  талантын жастайынан байқаған алғашқы бапкері Талғат Балмағанбетов  жаттығуда берілген тапсырманы бұлжытпай орындап, өзі қатарлас спортшылардан әрдайым ептілігімен, еңбекқорлығымен ерекшеленген бүлдіршіннің қанатын қатайтып, түрлі деңгейдегі жарыстарға қосады. Осылайша Ресейдің Самара қаласында өткен халықаралық  турнирде дзюдодан 35 келі салмақта ІІ орын алып, спорттағы алғашқы жетістігіне қол жеткізеді. 7 сыныпқа дейін  қаладағы дарынды балаларға арналған спорт интернатында білім алып, спортқа түбегейлі бет бұрған бозбала 8 сыныптан бастап Астана қаласындағы Қажымұқан Мұңайтпасов атындағы спортқа дарынды балаларға арналған интернатына ауысады. Мектеп бітірген соң Алматы қаласындағы республикалық спорт колледжіне оқуға түседі. Осы білім ордасында Қазақстан Республикасының аға жаттықтырушысы  Нұрбол Сүлейменовтің көзіне түседі.

Қазір жиырма бестен асқан буыршын жасты Орал қаласының аға жаттықтырушысы Азамат Капсатов пен республикалық колледждегі бапкері Нұрбол Сүлейменов баптап жүр.  

Жас спортшы табандылығының арқасында дзюдо және самбо күресінен ҚР чемпионы, Жастар арасында ҚР чемпионы, дзюдодан жастар арасында Азия чемпионы, командалық жарыста Әлем чемпионатының қола жүлдегері, ересектер арасында ҚР чемпионатының бірнеше дүркін жеңімпазы атанып үлгерген.  ҚР чемпионатында төрт күміс, бір қола жүлдені иеленген, Еуропа Кубогын ұтқан.  

     –      Менің әр жеңісім – қиын жаттығулар мен жаттықтырушылардың шыңдалуыма жұмсаған еңбегінің нәтижесі, – деген спорт шебері бүгінде Ұлттық құрама сапында жаттығып жүр.  Португалия елінде өткен турнирде иығынан жарақат алып, толық ем қабылдаған Аңсарбектің Азия Кубогы сегіз ай үзілістен кейінгі жетістігі.

Айта кету керек, облыста халықтың 39 пайызы дене шынықтырумен және кәсіби спортпен айналысады екен. Алайда кейбір елді мекендерде спортпен шұғылдануға қолайлы жағдай қарастырылмаған. Мысалы, 200-ден астам ауылда спорт нысаны мен секциялары жоқ. Ал мұндай мүмкіндіктердің болмауы ұлт денсаулығының нығаюына кері әсерін тигізеді.

Алдағы бес жыл ішінде облыста 39 спорт кешені мен 30 спорт алаңын салу, Оралдағы бір стадионды жаңғырту, 30-дан астам спорт секциясын ашу жоспарланып отыр. Бірінші кезекте көпбалалы және әлеуметтік осал топтар санатындағы отбасылардың балаларына барынша қолдау көрсетіледі. 10 мыңнан астам бұқаралық спорт шаралары мен жарыстарды өткізу көзделген. Негізгі мақсат – халықтың спорт нысандарымен қамтылу көрсеткішін 65 пайызға, ал дене шынықтыру және спортпен айналысатын халықтың үлесін кемінде 53 пайызға жеткізу.

Кәусар БАЙҒАЛИЕВА,

Батыс Қазақстан облысы