Елімізде 48 мыңнан астам мүгедек жан спортпен шұғылданады

Azattyq Rýhy

Республика бойынша әр өңірде мүмкіндігі шектеулі тұлғаларға арналған арнайы 17 спорт мекемесі жұмыс істейді

Елімізде 48 мыңнан астам мүгедек жан спортпен шұғылданады

Паралимпиадалық спорт түрлері бойынша елімізде 15 спорт түрі дамып жатыр. Ұлттық құрамада 484 спортшы бар. Олармен 34 бас және аға жаттықтырушы жұмыс істейді. Штаттағы спортшылар саны – 112. Бұл туралы Орталық коммуникациялар қызметінде МСМ Спорт және дене шынықтыру істері комитетінің төрағасы Самат Ерғалиев мәлімдеді, деп хабарлады Elorda.info.

"Елімізде мүмкіндігі шектеулі тұлғалар арасында 15 паралимпиадалық, 21 сурдолимпиадалық және Паралимпиада ойындарының бағдарламасына енбеген 8 спорт түрі дамытылған. 2021 жылдың қорытындысы бойынша мүмкіндігі шектеулі адамдар саны 696 825 адам құрады, оның 48 565-і спортпен міндетті шұғылданады. Республика бойынша әр өңірде мүмкіндігі шектеулі тұлғаларға арналған арнайы 17 спорт мекемесі жұмыс істейді. Бүгінгі таңда, елордада мүмкіндігі шектеулі тұлғаларға арналған мамандандырылған спорттық кешен жұмыс істеуде", – деді С.Ерғалиев.

Комитет төрағасының айтуынша, алдағы Паралимпиада ойындарына дайындық халықаралық тәжірибеге сүйене отырып жүргізіледі.

Қазіргі таңда параспорт түрлері бойынша шетелдік кеңесшілерді тарту қарастырылып жатыр. Сонымен қатар, Париж және Милан Паралимпиадаларына арнайы бағдарлама әзірленіп, Ұлттық паралимпиада комитеттерімен бірлесе жұмыс жүргізілетін болады.

×
Бұл желілік ресурстың ақпараттық өнімдері 18 жастан асқан адамдарға арналған.