Сенат депутаты қысқы Олимпиада ойындарына қатысатын Қазақстан құрамасының дайындығына алаңдаушылық білдірді

Сенат депутаты Нұржан Нұрсипатов Қазақстан құрамасының қысқы Олимпиада ойындарына дайындық барысы туралы Мәдениет және спорт министрлігінен ақпарат беруді талап етті. Ол өзінің депутаттық сауалын Сенаттың бүгінгі отырысында оқыды.

Сенатор еліміздегі балалар мен жасөспірімдер спортын қаржыландыруды ұлғайтудың маңыздылығын атап өтті. Депутаттың пікірінше, Президенттің бұқаралық спортты дамыту жөніндегі тапсырмасын орындау жөнінде белсенді жұмыстар жүргізілуі қажет. Нұржан Нұрсипатов сондай-ақ, алдағы Олимпиадаға дайындықтың барынша жоғары деңгейіне қол жеткізу үшін қажетті шаралар, оның ішінде заңнамалық сипаттағы ұсыныстар туралы салалық министрліктен хабардар етуді сұрады.

«2022 жылдың 4-20 ақпан аралығында Бейжіңде XXIV қысқы Олимпиада ойындары өтеді. Яғни олардың басталуына бес айдан аз уақыт қалды. Қазақстандықтар өткен жазғы Олимпиаданың нәтижесін қайталағысы келмейтініне сенімдімін. Осыған байланысты алдағы ойындарға дайындық деңгейі қандай? Токиодағы жағдайдың қайталанбауы үшін не істеу керек? Біздің «қысқы» құраманы іріктеу, жаттықтыру және қаржыландыру жұмыстары қалай жүргізіледі, деген сұрақтар туындайды»,- деді Нұржан Нұрсипатов.