«Спорттан кетемін деп еш жерде жазған жоқпын»: Ольга Рыпакова журналистер мен блогерлерге жүгінді

2012 жылы Лондонда өткен Олимпиада чемпионы, үш қарғып секіруден Әлем чемпионатының күміс жүлдегері Ольга Рыпакова спорттан кететіні туралы еш жерде мәлімдеме жасамағанын айтты.

«Спорттан кететінім туралы ешбір жазбамда айтылған жоқ. Токио Олимпиадасында менің үш қарғып секіруден карьерамды аяқтағаным туралы жалған ақпараттың тарағаны өкінішті. Әрбір үлкен жарыстан кейін спортшыға демалыс керек. Әрбір жеңіліс пен жеңістен кейін келесі жарысқа тыңғылықты дайындалу керек. Мен де дайындаламын. Жарысқа қатысу - кез келген жастағы спортшы үшін үлкен мүмкіндік. Алда көп додалар бар.

Журналистер мен блогерлерден жалған ақпарат таратпауды сұраймын. Егер карьерамды аяқтайтын болсам, жанкүйерлерім оны бірінші болып естиді», - деп жазды спортшы.

Еске салайық, Ольга Рыпакова Олимпиада ойындарынан бірінші рет жүлдесіз оралды. Ол бұған дейін күміс (Пекин-2008), алтын (Лондон-2012) және қола жүлде алған (Рио-2016).