Қазақстан Жапонияда өтіп жатқан Азия ойындарының төртінші күнінде жеті медаль жеңіп алды

23 қыркүйекте Жапонияның Айти және Нагоя қалаларында өтіп жатқан 2026 жылғы Азия ойындарында кезекті жарыс күні аяқталды. Қазақстан құрамасы жеті медаль – бір алтын, үш күміс және үш қола медаль жеңіп алды, деп хабарлайды Azattyq Rýhy  ҚР Ұлттық олимпиада комитетінің сайтына сілтеме жасап.

Төрт жарыс күнінің қорытындысы бойынша Қазақстан құрамасының еншісінде 19 медаль – жеті алтын, төрт күміс және сегіз қола. Жалпы командалық медальдар есебінде Қазақстан төртінші орында тұр.

Күннің басты оқиғасы велоспорттан ерлер арасындағы тасжолдағы топтық жарыс болды. Алексей Луценко мәреге бірінші болып келіп, қазіргі ойындарда екінші рет тұғырдың ең биік сатысына көтерілді. Бұл оның Азия ойындарындағы мансабындағы алтыншы алтын медалі болды.

Луценко каноэші Константин Негодяевтың жетістігін басып озып, Қазақстанның жазғы Азия ойындарындағы жеңістер саны бойынша рекордшысы атанды. Топтық жарыстағы Қазақстан құрамасының жетістігін Евгений Федоров толықтырды. Қазақстандық спортшы мәрені екінші болып кесіп өтіп, күміс медаль жеңіп алды. Федоров үшін бұл Азия ойындарындағы мансабындағы екінші жүлде. Ол Ханчжоу-2022-де топтық жарыста жеңімпаз атанған.

Тағы бір күміс медальді Кристина Морозова жеңіп алды. Жеңіл атлетика бағдарламасының алғашқы күнінде ол жартылай марафон қашықтығындағы спорттық жүрістен екінші орын алып, 1:35:25 нәтижесін көрсетті.

Стенд атудан Қазақстан қоржынына екі медаль түсті. Әйелдер арасындағы скиттен командалық есепте Әсем Орынбай, Зоя Пискун және Адель Садақбаева екінші орын алды. Қазақстан құрамасы 336 ұпай жинап, тек Қытай спортшыларынан ұтылды.

Кейін Орынбай жеке сайыста тағы бір медаль жеңіп алды. Финалда қазақстандық спортшы 28 нысананы дәл атып, қола жүлдегер атанды. Бұл оның Азия ойындарындағы екінші жүлдесі. Сондай-ақ Орынбай Азия ойындарында жеке скиттен екінші рет қатарынан үшінші орын алды. Зоя Пискун финалда алтыншы болды.

Қазақстанға осы Азия ойындарындағы семсерлесуден алғашқы медальді Артем Саркисян әкелді. Саблистер арасындағы жеке турнирдің ширек финалында ол Оңтүстік Кореяның Олимпиада чемпионы До Гондонды 15:14 есебімен жеңді. Жартылай финалда Саркисян үш дүркін Олимпиада чемпионы О Сан Укке 9:15 есебімен есе жіберіп, жарысты қола медальмен аяқтады.

Қола жүлдегер атанған спортшылардың қатарында Әліжан Аблагатов та бар. Ушу-саньдадан 70 келіге дейінгі салмақта өткен жарыстың жартылай финалында Қазақстан өкілі ирандық Эрфан Мохаррамиден жеңілді.

Сол спорт түрінде Қазақстанның алтын медаль үшін күресуге мүмкіндігі бар. 75 келіге дейінгі салмақта Абдурашид Абдуллаев финалға шықты. Жартылай финалда ол Қытай Тайбэйінің өкілі Хуан Жанды жеңді. Ол шешуші жекпе-жегін 24 қыркүйекте өткізеді.

Спорттық гимнастикадан Қазақстанның ерлер құрамасы жүлдеге бір қадам жетпей қалды. Нариман Құрбанов, Дмитрий Патанин, Милад Карими, Нұртан Ыдырысов және Ильяс Әзизов 237,596 ұпай жинап, командалық финалда төртінші орын алды. Қола жүлдені 239,896 ұпаймен Қытай Тайбэйі жеңіп алды.

Қазақстанның жүзуден құрама командасы да аралас 4×100 метрлік кешенді эстафетада төртінші орын алды. Финалда команда 3:49.19 нәтижесін көрсетті. Ксения Игнатова 100 метрге арқамен жүзуден финалда жеке өнер көрсетіп, алтыншы орын алды.

Оқ атудан Валерия Попелова 10 метр қашықтыққа пневматикалық тапаншамен атудан финалға өтті. Шешуші кезеңде қазақстандық спортшы 139,8 ұпай жинап, жетінші орын алды. Ерлер арасындағы скиттен Александр Мұхамедиев те финалға өтіп, алтыншы болды.

Боксшы Сабыржан Аққалықов күтпеген нәтиже көрсетті. Ол жарысты алғашқы жекпе-жегінен кейін аяқтады. 80 келіге дейінгі салмақтағы 1/8 финалда қазақстандық спортшы төрешілердің бөлінген шешімімен Оңтүстік Корея өкілі Минсон Кимге есе жіберді.

Үш жарыс күнінің қорытындысы бойынша Қазақстан құрамасының қоржынында 12 медаль – алты алтын, бір күміс және бес қола болған еді.

Айта кетейік, Жапонияда өтіп жатқан құрлықтағы ең ірі спорттық додада Қазақстан атынан 35 спорт түрінен 558 спортшы бақ сынайды. ХХ жазғы Азия ойындары 19 қыркүйек пен 4 қазан аралығында өтеді.