Алматыда 259 мыңнан астам зейнеткер мен 42 мың көпбалалы отбасы әлеуметтік қолдаумен қамтылған

Алматы қаласында әлеуметтік әл-ауқатты арттыру мен тұрғындардың өмір сапасын жақсартуға бағытталған кешенді жұмыс жалғасып келеді. Мемлекеттік зейнетақы төлеу орталығының 2025 жылдың қазан айындағы дерегіне сәйкес, қалада 259 614 зейнеткер және 42 056 көпбалалы отбасы тұрады. Олардың ішінде 6 488 ана «Алтын алқа» және «Күміс алқа» төсбелгісімен марапатталған, деп хабарлайды Azattyq Rýhy.

Қарттар мен зейнеткерлерге арналған қолдау шаралары

Алматы қаласы Жұмыспен қамту және әлеуметтік бағдарламалар басқармасы мамандарының мәліметінше, биылғы тоғыз айдың ішінде қаланың 14 «Белсенді ұзақ өмір сүру» орталығына 8 235 адам жүгінген. Оларға жалпы 455,3 мың қызмет көрсетілген.

Сонымен қатар мемлекеттік «Белсенді ұзақ өмір сүру» орталығының Бостандық ауданында екі, ал Медеу ауданында бір бөлімшесі жұмыс істейді. Бұл орталықтарға күн сайын орта есеппен 569 зейнеткер барады. 2025 жылдың басынан бері 24 153 азаматқа 333,1 мың қызмет ұсынылған.

Мұндай орталықтарда зейнеткерлер үшін денсаулықты нығайту, бос уақытты тиімді өткізу және психологиялық қолдау көрсету бағытында түрлі бағдарламалар ұйымдастырылады. Сондай-ақ қарттар қоғам өміріне белсене араласып, жаңа дағдыларды үйренуге мүмкіндік алады.

Отбасы институтын қолдау – басты бағыттардың бірі

Отбасы құндылықтарын нығайту және тұрмыстық қиындықтарға тап болған азаматтарға көмек көрсету мақсатында «Бақытты отбасы» орталығы табысты жұмыс істеп келеді. Қазіргі уақытта бұл орталықта 11 336 адам тіркелген.

Жыл басынан бері 41,9 мың адам ақпараттық-ресурстық қолдау алып, 6,1 мың адамға құқықтық және әдістемелік кеңес берілген. Сондай-ақ 2,7 мың адам арнайы оқыту бағдарламалары мен тренингтерге қатысқан.

Бағдарламаның нәтижесінде 237 адам жұмыспен қамтылып, 45 адамға 400 АЕК-ке дейінгі гранттар берілген.

2025 жылдың қаңтар айынан бастап Алматыда өмірлік қиын жағдайға тап болған азаматтарға кешенді көмек көрсететін Отбасын қолдау орталығы да жұмыс істей бастады. Бір жыл ішінде орталыққа 956 адам тіркеліп, 2,8 мың тұрғын түрлі қолдау түрін алған.

Атап айтқанда, 439 адамға психологиялық, 242 адамға құқықтық көмек көрсетіліп, 118 мобильді топтың шығуы ұйымдастырылған. Сонымен қатар 989 жеке жұмыс жоспары әзірленген.

Балалар мен жастарды қолдау жобалары

Қалалық әлеуметтік саясат балалар мен жасөспірімдерге де ерекше көңіл бөледі. Мәселен, «Шыңға өрлеу» әлеуметтік клубы жобасы аясында қала бойынша 16 бөлімше жұмыс істейді. Бұл бағдарламаға аз қамтылған отбасылардан шыққан 2 947 бала қатысып жүр. Сабақтарды 298 педагог жүргізеді, олардың 228-і – халықтың әлеуметтік осал тобына (ХӘОТ) жататын мамандар.

Сонымен қатар «Тәуелсіз өмір мектебі» жобасы бойынша 432 адам қамтылған. Бұдан бөлек, қалалық деңгейде «Жарқын өмір», «Жаңа өмір» және Isker isi әлеуметтік бастамалары іске асырылуда. Бұл жобалар еңбек нарығына бейімдеу, дағды қалыптастыру және жеке кәсіпкерлікті дамыту бағыттарын қамтиды.

Ерекше балаларға арналған емдік бағдарламалар

Алматыда ерекше қажеттіліктері бар балаларды әлеуметтік бейімдеуге арналған «Иппотерапия – бейімделген ат спорты» жобасы да жүзеге асырылып жатыр. Бүгінде оған 50 бала қатысады.

Сонымен бірге Қалалық әлеуметтік интеграция орталығында арт-терапия, театр-терапия және музыка-терапия бағдарламалары жұмыс істейді. Бұл бағыттағы шараларға жүздеген тұрғын қатысып, шығармашылық арқылы өз әлеуетін дамытуға мүмкіндік алуда.

Қалалық әлеуметтік саясаттың басты мақсаты

Алматы қаласының әкімдігі мен әлеуметтік бағдарламалар басқармасының айтуынша, барлық атқарылған шаралардың түпкі мақсаты – қала тұрғындарының өмір сапасын арттыру, отбасылардың тұрақтылығын сақтау және қоғамдағы әлеуметтік теңдікті қамтамасыз ету.

«Біздің міндетіміз – әр тұрғынның өмір сүру деңгейін жақсартып, қиын жағдайға тап болған жандарға нақты көмек көрсету. Бұл бағыттағы жұмыстар алдағы уақытта да жалғасады», – дейді басқарма өкілдері.

Қаланың әлеуметтік инфрақұрылымын дамыту, халықты қамту және тұрғындарға қолжетімді қызмет ұсыну – Алматының әлеуметтік тұрақтылығы мен азаматтардың сенімін арттыруға бағытталған маңызды бастамалардың бірі болып қала береді.