«Баланы мектепке дайындайық!»: Алматыда 200 бала оқуға қажет құрал-жабдыққа ие болды

«AMANAT» партиясының «Бақытты отбасы» жобасы аясында дәстүрлі түрде өтетін «Баланы мектепке дайындайық!» қайырымдылық акциясының арқасында 200 бала мектепке қажетті құрал-жабдықтармен қамтылды, деп хабарлайды Azattyq Rýhy партияның баспасөз қызметіне сілтеме жасай отырып.

Айта кетейік, бұл қайырымдылық акциясы 2010 жылдан бері үздіксіз өтіп келе жатыр. Биыл ол Конституцияның 30 жылдығына арналды.

Акцияның негізгі мақсаты – балаларды жаңа оқу жылына дайындап қана қоймай, оларға қуаныш сыйлап, білімге деген ынтасын арттыру, ата-аналарға қолдау көрсетіп, қоғамда қайырымдылық пен өзара жәрдемдесу дәстүрін нығайту. «AMANAT» партиясының Алматы қалалық филиалының төрағасы Станислав Канкуров ата-аналарды және бүлдіршіндерді мерекемен құттықтап, жылы лебізін арнады.

«Ең алдымен баршаңызды Конституциямыздың 30 жылдығымен және жаңа оқу жылының басталуымен құттықтаймын. «Баланы мектепке дайындайық!» акциясы 2010 жылдан бері тұрақты түрде өтіп келеді. Жыл сайын мәслихат депутаттарының, партия белсенділері мен кәсіпкерлердің қолдауымен екі мыңға жуық алматылық оқушы мектепке қажетті құрал-жабдықтармен қамтамасыз етіледі. Бұл – болашағымыздың кепілі саналатын жас ұрпаққа жасалып отырған нақты қамқорлық», – деп атап өтті ол.

Бұл жолғы акцияға партия мүшесі, белгілі кәсіпкер, бизнес-тренер Аманжол Рысмендиев демеушілік етті. Оның қолдауымен оқушыларға мектеп сөмкелері мен оқу құралдары табысталды. Станислав Канкуров қайырымдылыққа қосқан үлесі үшін демеушіге партия атынан Алғыс хат тапсырды.

Сонымен қатар іс-шара барысында Ariding International компаниясының өкілі Ақмаржан Бақытқызы сөз сөйлеп, әлеуметтік жауапкершіліктің бизнес үшін де маңызды екенін атап өтті.

Жиналған ата-аналар атынан да жылы лебіздер айтылып, балаларға жаңа оқу жылына сәттілік тіледі. Балдырғандарға арнайы дайындалған мектеп сөмкелерін партия филиалының төрағасы мен демеушілер өз қолдарымен табыстады.

Ұйымдастырушылардың айтуынша, мұндай қайырымдылық акциялары балалардың болашағына сенім ұялатып қана қоймай, қоғамда бірлік пен өзара қолдау құндылықтарын нығайта түседі.