Қазақстан ана өлімін айтарлықтай тез төмендеткен он елдің қатарына кірді - үкімет

Премьер-министрдің орынбасары – ұлттық экономика министрі Серік Жұманғарин Орнықты даму жөніндегі үйлестіру кеңесінің отырысын өткізді. Онда Орнықты даму мақсаттары жөніндегі (ОДМ) үшінші ерікті ұлттық шолудың тұсаукесері өтті, деп хабарлайды Azattyq Rýhy.

Үкімет таратып отырған мәліметке сүйенсек, Қазақстан ана өлімін тез азайтқан он елдің қатарына кірген.

Үшінші ерікті ұлттық шолу таныстырылды

БҰҰ-ның Қазақстандағы тұрақты үйлестірушісінің міндетін атқарушы Стивен О'Малли Қазақстанның бұл шолу арқылы тек есеп беріп қана қоймай, ОДМ-ға деген шынайы бейілділігін көрсетіп отырғанын атап өтті.

«Қазақстан – шолуды үш жылда бір рет тұрақты өткізетін санаулы елдердің бірі. Бұл – ашықтық пен жаһандық серіктестікке берілгендіктің белгісі», — деді Стивен О'Малли.

Жергілікті деңгейдегі нақты қадамдар

Ұлттық экономика вице-министрі Асан Дарбаев құжатта жаһандық мақсаттардың аймақтық және жергілікті деңгейде жүзеге асуына ерекше назар аударылғанын жеткізді. Сондай-ақ, құжатты әзірлеуге азаматтық қоғам мен сарапшылар қауымдастығының белсенді қатысуы басты ерекшеліктердің бірі ретінде көрсетілді.

Институционалдық реформалар және стратегиялық жоспарлар

2023 жылы:

• ОДМ мониторингі бойынша Парламенттік комиссия құрылды.
• 2060 жылға дейін көміртегі бейтараптығына қол жеткізу стратегиясы қабылданды.
• Ұлттық ОДМ индикаторлары жаңартылып, қазіргі таңда олардың саны 200-ге жетті.

Бұл көрсеткіштер Қазақстанның орнықты дамуға бағытталған нақты әрі жүйелі жұмысының нәтижесі екенін айғақтайды.

Әлеуметтік саясат және гендерлік теңдік

Экономикалық зерттеулер институтының басқарма төрағасы Әсел Сәрсенбаева шолуда көрсетілген әлеуметтік нәтижелерге тоқталды. Оның айтуынша:

• Қазақстан «Ешкімді артта қалдырмау» қағидатын нақты іске асырып келеді.
• Әлеуметтік кодекс әлеуметтік саясаттың негізін күшейтті.
• Гендерлік теңдік саласында ірі компаниялар харассментке қарсы саясаттар енгізіп, инклюзивті жұмыс мәдениетін қалыптастыруда.
• Қоғамда құқықтық мәдениет өсіп, сот жүйесіне деген талаптар артып отыр.

Халықаралық деңгейдегі мойындау және алдағы жоспарлар

Қазақстанның ОДМ-ға бейілділігі Алматыда БҰҰ-ның Орталық Азия мен Ауғанстан бойынша өңірлік орталығының ашылуымен де расталып отыр.

Орнықты даму жөніндегі үйлестіру кеңесін қорытындылай келе, Серік Жұманғарин ОДМ қағидаттарын енгізу – халықтың өмір сүру сапасын арттыру, халықаралық стандарттарға сай болу және елдің жаһандық беделін нығайту екенін баса айтты.

Қазақстанның үшінші ерікті ұлттық шолуы 2025 жылдың шілде айында Нью-Йоркте өтетін жоғары деңгейдегі Саяси форумда таныстырылады.