Ұлыбританиядан келген судья қазақ студенттерінің сотына төрелік етті

Астана халықаралық қаржы орталығының сотында жыл сайын студенттер арасында өтетін «AIFC Court Moot» сот процессі өтті. Байқауға АХҚО Сотының аға судьялары төрелік етті, деп хабарлайды Azattyq Rýhy.

«AIFC Court Moot» – студенттер арасында өтетін сот процессінің үлгісіндегі отырыс. Бұл ағылшынның жалпы құқық дәстүріне негізделген процесс. Іс-шара Қазақстан мен Еуразия өңірінің дарынды студент-заңгерлерін жинап, олардың АХҚО Соты судьяларының алдында өз білімдері мен дағдыларын көрсетуіне мүмкіндік береді.

Сот процесінің симуляциясы барысында студенттерден құралған топтар ойдан шығарылған іс бойынша өз дәлелдерін (жазбаша және ауызша) дайындап, АХҚО Сотының аға судьяларының алдында қорғайды. Бұл – болашақ заңгерлерге заңды талдау, құқықтық ұстанымдарды қалыптастыру және көпшілік алдында сөйлеу дағдыларын жетілдіруге мүмкіндік беретін маңызды тәжірибелік алаң.

Байқаудың финалына алдыңғы кезеңдерде көрсеткен жақсы нәтижелері бойынша іріктелген студенттер өтті.

Финалды АХҚО Сотының төрағасы Мэлдон Лорды Бернетт және АХҚО Сотының басқа да аға судьялары бағалады. 

«Біз АХҚО Соты студенттік сот процессі байқауы жеті жыл қатарынан өтіп келе жатқанын және қатысушы университеттердің оқу бағдарламасының ажырамас бөлігіне айналғанын мақтан тұтамыз.  Студенттердің деңгейі жыл сайын жоғарылап келеді. Біз Еуразиядағы таңдаулы халықаралық коммерциялық сот ретінде негізгі серіктестерімізбен және заң қауымдастығымен тығыз қарым-қатынас қалыптастыруды жалғастырып келе жатқандықтан, бұл студенттер үшін де, біздің сот үшін де маңызды жарыс», - дейді АХҚО және ХТО сотының тіркеушісі және аппарат басшысы Кристофер Кэмпбелл-Холт.