«Адамдарға үйрене алмай, түнде шошып оянады»: заңгер жас жігіт 10 ай құлдықта болғанын айтып берді

Әйелдер күресінен Азия чемпионатының жүлдегері Айша Уәлиханның күйеуі 23 жастағы Мұқан Неғматовты құлдықта ұстаған болуы мұмкін. Бүгінгі таңда осы оқиға бойынша қылмыстық іс тіркелген, деп хабарлайды Azattyq Rýhy.

Редакция Мұқан Неғматовтың заңгері, құқық қорғаушы Нұрболат Ибраевтан істің мән-жайын сұрап білді.

«ҚР Қылмыстық кодексінің 126-бабының 1-тармағы бойынша қылмыстық іс қозғалды. Алайда оны 126-баптың 2-тармағына ауыстыруды көздеп отырмыз. Себебі бұл жерде 2 емес, тіпті 3 адам жәбір көрсеткен. Ал 2-тармақтың жазасы 5 жылға дейін бас бостандығынан айыруды көздейді. Қазір оған өмірге қайта бейімделіп, психологтің көмегі қажет. Әлі де қорқады, сенбейді. Психологиялық көмекті ұсынатындар болса, қуанамыз. Қазір ол отбасының жағдайы келмей жатыр. Бірнеше сараптама жасау керек. Олардың барлығы ақылы. Психологиялық сараптамадан өту үшін 1,1 млн теңге керек дейді. Медициналық сараптаманы Алматыдан тағайындайын деп едік, бірақ ол да ақылы болып отыр», - дейді Нұрболат Ибраев.

Заңгердің айтуынша, ол Мұқан Неғматовқа құқықтық көмекті тегін көрсетеді. Алайда ақылы сараптамадан өту қыруар қаржыны қажет етіп отыр.

«Демеушілік көмек болса, жағдай бірқатар алға жылжитын еді. Себебі, отбасының ондай ақшасы жоқ. Мұқанның өзінің жағдайы да күрделі. Себебі 10 ай құлдықта болған соң, адамдарға үйрене алмай, түнде шошынып оянып жатыр. Жүйкесі жұқарған. Күні кеше психологқа барғанда да мамандар жүйкесі сыр берген деп жатыр. Басында соққыдан қалған тыртықтар өте көп. Қазір ол Алматыдағы үйінде», - дейді заңгер.