Қостанайда ішімдіктің салдарынан адам өлтіріп қойған караоке диджейіне қатысты үкім шығарылды

Қостанай облыстық сотының қылмыстық істер жөніндегі сот алқасы "JB" караоке-бар диджейі Ф.-ға қатысты үкім шығарды. Ол ҚР Қылмыстық кодексінің 104-бабының 1-бөлімі бойынша адам өліміне әкелген қылмыстық құқық бұзушылық жасады деп айыпталған. Бұл іс алдыңғы сот актілерінің күшін жоюға байланысты апелляциялық сотта қайта қаралды, деп хабарлайды Azattyq Ruhy облыстық соттың баспасөз қызметіне сілтеме жасап.

Оқиға 2023 жылдың 29 мамырында Қостанай қаласындағы "JB" караоке-барының жанында болған. Тергеу мәліметтері бойынша, диджей Ф. мас күйінде болған Ж.-мен жанжалға түсіп, төбелес кезінде жәбірленушінің бетіне жұдырығымен соққы жасаған. Соққы салдарынан Ж. құлап, басын асфальтқа соғып, ауруханада есін жимастан көз жұмған.

Апелляциялық сот қарауы кезінде бейнебақылау камераларының жазбалары, куәгерлердің айғақтары және сараптама қорытындылары сотталушының кінәсін толық дәлелдеді. Ф. жанжал кезінде жәбірленушіге соққы жасаудың қажеттілігі болмағаны және Ж.-дан оның өміріне нақты қауіп төнбегені анықталды.

«Сот Ф.-ның кішкентай баласы бар екенін және жанжалдың жәбірленуші тарапынан басталғанын ескеріп, жазаны жеңілдететін жағдайлар ретінде қарастырды. Ауырлататын жағдайлар табылмады. Жәбірленушіге келтірілген залалдың өтелмегені және сотталушының өз ісіне өкінбеуі жазаны тағайындауда ескерілді. Сот Ф.-ны 1 жыл 6 айға бас бостандығынан айыру жазасына кесіп, оны қылмыстық-атқару жүйесінің ең төменгі қауіпсіздік мекемесінде өтеуге үкім етті. Ф. сот залында қамауға алынды», - делінген хабарламада.