Аягөз полициясы мұғалім ағасынан зорлық көрдім деген қыздың ісін тоқтатып тастаған

Күні кеше Аягөз маңындағы Мәдениет ауылында тұратын Еркеназ есімді қыз қазақстандықтарға арнаған үндеуінде дене шынықтыру пәнінен сабақ берген туысқан ағасы оны 11 жасынан бастап зорлағанын мәлім еткен еді, деп хабарлайды Azattyq Rýhy.

Бүгін бұл іске қатысты мәлімет берген Абай облысының полициясы істі тоқтатқанын хабарлады.

«Аягөз аудандық полиция бөлімі сотқа дейінгі тергеп-тексеру жүргізді, оқиғаның барлық мән-жайлары жан-жақты және толық зерттелді. Тергеу барысында қажетті сараптамалар, оның ішінде кешенді комиссиялық сараптамалар жасалды. Сараптаманың нәтижесі бойынша қылмыстық құқық бұзушылық құрамының болмауына байланысты істі тоқтату туралы шешім қабылданды, аталған шешімді прокуратура бекітті», - деп хабарлады облыстық полиция департаменті.

Абай облысы бойынша бала құқығы жөніндегі уәкіл Эльзира Жүнісова Бас прокурорға өтініш жолданғанын хабарлаған еді.

«Ақпарат алғаннан кейін бірден Еркеназбен кездесіп, содан бері байланыстамыз. Оның туған анасымен телефон арқылы сөйлестім. Еркеназға қазір психологтар көмектесіп жатыр. Колледж әкімшілігі жатақханадан бөлме берді. Бала құқықтары жөніндегі уәкіл Динара Зәкиевамен байланыстамыз, ол Бас прокуратураға тиісті өтініш жолдады», - деп хабарлаған Жүнісова.