Air Astana мен Бибігүл Төлегенова арасындағы іске Аида Балаева араласты

Мәдениет және ақпарат министрі Аида Балаева Air Astana компаниясының Бибігүл Төлегеноваға жасаған әрекетіне қатысты пікір айтты, деп хабарлайды Azattyq Rýhy.

«Қазақстанның және КСРО-ның халық әртісі, аты аңызға айналған әнші Бибігүл Төлегеновны Air Astana әуе компаниясының бортына отырғызу кезінде болған өте ыңғайсыз жағдай мені де қатты алаңдатты. Әуе компаниясы бұл мәселе қатысты түсініктеме беріп, әуе қауіпсіздігінің халықаралық ережелері еске салды. Әрине, ұшақтың және жолаушылардың қауіпсіздігін қамтамасыз етуге арналған ережелер қатаң сақталуға тиіс», - деді Балаева.

Министр әуе компаниясымен пікір қайшылығына бармай-ақ, орын алған жағдайға байланысты өз ойы бар екенін айты.

«Нақтырақ айтқанда, әуе компаниясы мен оның қызметкерлері ішкі нұсқаулықтардан бөлек, қарапайым этиканы, адами қарым-қатынасты сақтап, өз клиенттеріне құрметпен қарауы керек деп есептеймін. Әсіресе, жасы үлкен жолаушыларға, Отан алдында айрықша еңбегі бар адамдарға ерекше құрмет көрсетілуге тиіс. Өйткені аға буынға құрмет – тәрбие мен ішкі мәдениет мәселесі. Ал қазақ өнерінің бұлбұлы, өнер майталманы Бибігүл Ахметқызына зор денсаулық, ұзақ өмір мен сарқылмас күш-жігер тілеймін», - дейді министр.

Еске салсақ, Қазақстанның халық әртісі, аты аңызға айналған әнші Бибігүл Төлегеновны Air Astana қызметкері бортқа кіргізбей әрі дөрекі сөйлеген.