«Бізді де алаңдатады»: министр әскердегі сарбаздардың денсаулығына қатысты пікір айтты

Денсаулық сақтау министрі Ақмарал Әлназарова ауыр хәлдегі сарбаз Ербаян Мұхтарға қатысты пікір білдірді, деп хабарлайды Azattyq Rýhy.

«Денсаулық сақтау министрлігі бұл мәселені өз тарапынан бақылауда ұстап отыр. Тиісті консилиум, басқа да көмек көрсетуге біз толықтай дайынбыз. Жұмыс атқарылып жатыр. Отан алдында борышын өтеп жатқан сарбаздардың денсаулығына тиісті медициналдық комиссия қарайды. Қорғаныс министрлігінің жергілікті жердегі комиссиясымен бірлесе отырып, қаралады. Бірақ сарбаздардың денсаулығына байланысты сұрақтар бар. Медициналық тексерістен өте бермейді. Жарамсыз болып жатады. Бұл мәселе бізді де алаңдатады. Себебі олардың денсаулығына қатысты мәселе тікелей бізге қатысты», - дейді Әлназарова.

Еске салсақ, өткен жылдың желтоқсан айында әскери қызметші Ербаян Мұхтар комаға түскен болатын. Әскери бөлімдегілер оның әжетханада құлап, басын плиткаға соғып алғанын айтып, бұл оқиғаны жазатайым жағдай деп түсіндірген. Алайда туыстары бұл нұсқаны қабылдамады. Ербаян бас сүйек-ми жарақатын алған, ол Алматы қаласындағы 5571 әскери бөлімінің ұлттық гвардиясында қызмет еткен. Қазір оның ЭКГ, жүрек эхо-кардиографиясы және өкпе рентгені сияқты медициналық тексерістері белгіленген. Дәрігерлер Ербаянның ұзақ уақыт арқасымен жатуы қан тамырларына жүктеме түсіріп, өкпеде тоқыраулы пневмонияның бар-жоғын анықтауы керек.