Қазақстанның атом өнеркәсібін дамыту қауымдастығы мәлімдеме жасады

Қазақстанның атом өнеркәсібін дамыту қауымдастығы үкіметтің бірінші атом электр станциясын салу бастамасын қолдайды, деп хабарлайды Azattyq Rýhy Қазақстан атом өнеркәсібін дамыту қауымдастығы төрағасы Алдияр Тоқтаровтың мәлімдемесіне сілтеме жасай отырып.

«Әр ұлттың дамуында болашақ ұрпақтың тағдыры шешілетін маңызды кезеңдер болады. Солардың бірі – АЭС салу мәселесі, бұл шешім біздің технологиялық және өндірістік дамуымызға қарай қадам басуымызды не болмаса тек шикізат өндіру мен экспортқа тәуелді экономика ретінде қалуымызды айқындайды. Менің және менің әріптестерімнің қауымдастықтағы міндеті – балаларымызға, немерелерімізге және шөберелерімізге гүлденген және дамыған елді қалдыру үшін бар күш-жігерімізді жұмсау»,- дейді Алдияр Тоқтаров.

Оның айтуынша, Қазақстанда уранның ерекше қорлары көп.

«Біздің жеріміз бен халқымыз ядролық қарудың зардаптарынан өткен ауыр сынақтарды бастан кешірді. Бұл қайғылы оқиға тек тарихымызға жара салып қана қоймай, Қазақстанға бейбіт атом мәселелерімен айналысуға ерекше моральдық құқық береді деп есептеймін. Қазақстан халқының атом энергиясын бейбіт мақсатта пайдалануды қолдауы тек коммерциялық тұрғыдан ғана емес, бұл біздің ұлтымыздың кемелденгенінің белгісі, жасөспірімдік максимализмнен өтіп, болашаққа салқынқандылықпен қарап, ең жақсы перспективаларды таңдап алуымыздың айғағы. Бұл – Қазақстан әлемдік деңгейде жетекші орын алатын салалардың бірі және халықаралық аренада өз ұстанымын сәтті қорғай алатын сала», - деп атап өткен Тоқтаров мәлімдемесінде.

Өз тарапынан ол «Қазақстанның атом өнеркәсібін дамыту қауымдастығының төрағасы ретінде, осы жобадан еліміздің тұрғындары мен бизнесі үшін ең жоғары пайда алуына бар күш-жігерімізді салатынымызды жауапкершілікпен» мәлімдеген.