Комитет басшысы: Мамырдан бастап карантин тәртібін бұзғандар күрт көбейді

Қазақстанда үй  карантині тәртібін бұзғандар көбейіп жатыр. Бұл туралы ҚР ДСМ Тауарлар мен көрсетілетін қызметтердің сапасы мен  қауіпсіздігін бақылау комитетінің төрағасы Тимур Сұлтанғазиев мәлімдеді.

«30 сәуірдегі мониторинг нәтижесі бойынша, үй карантиніндегі адамдардың 4%-ы карантин тәртібін бұзғанын анықтадық. Мамыр айында бұл көрсеткіш 29%-ға артты. Бұл мәліметтер құқық қорғау органдарына жіберілді. Біз індеттің таралмауы үшін әрі қарай да оқшаулану талаптарын қатаң сақтауымыз қажет. Егер ЖРВИ белгілері байқалса, міндетті түрде жедел жәрдем шақырып, үйде қалу керек», - деді ол.

Комитет басшысының айтуынша, ЖРВИ белгілері анықталған науқастар коронавирусты 4 адамға дейін жұқтыруы мүмкін. Сондықтан оқшауланып, карантиндік режимді сақтау аса маңызды.

Мамыр айының соңына дейін науқастарды анықтау үшін күнделікті тестілеуден өтетіндер 25 мыңға жетеді. 

«Тестілеу жекеменшік және мемлекеттік зертханаларда өткізіліп жатыр. Қазір күніне 19 000 тестілеу жүргізетін деңгейге жеттік. Осы көрсеткішті айдың соңына дейін 25 мыңға жеткіземіз», - деді Т. Сұлтанғазиев.

Абай Сейфулла, Нұр-Сұлтан