«Тегін бермеңіздер, ұят болады»: елордада Тәжікстанның ұлттық тағамдарының жәрмеңкесі өтіп жатыр

Астанада ауыл шаруашылығы өнімдерінің, ұлттық қолөнердің және Тәжікстанның ұлттық тағамдарының жәрмеңкесі өтіп жатыр, деп хабарлайды  Azattyq Ruhy елорда әкімдігінің ресми сайтына сілтеме жасап.

Жәрмеңкеде жаңа піскен жеміс-жидек, көкөніс, табиғи бал, жаңғақ, кептірілген жеміс, түрлі дәмдеуіштер және т.б. бар. Сондай-ақ, ұлттық қолөнер бұйымдарын – былғарыдан, керамикадан, ағаштан жасалған бұйымдар, қолдан тігілген кілемдер, кәдесыйлар сатып алуға болады.

«Іс-шарада елорда тұрғындары мен қонақтары сол сияқты жаңа өнімдер, кәдесыйлар мен қолдан жасалған бұйымдар, дәстүрлі тәжік тағамдарын сатып ала алады. Жәрмеңке «Барыс-Арена» спорт кешеніне іргелес аумақта 10 тамыз күні сағат 11:00-ден 19:00-ге дейін, 11 тамыз күні сағат 10:00-ден 19:00-ге дейін жұмыс істейді», - делінген хабарламада.

Өз кезегінде оқырмандар іс-шараның дүрбелеңсіз өтуіне тілектес екендерін жазып, түрлі пікірлерін қалдырған.

«Тегін бермеңіздер, ұят болады... Осы ақпаратты естісем, былтырғы жылғы жабайылық еске түседі... Жоқ биыл жабайылар келмепті, бәрі әдемі өтіп жатыр...», - деп жазған оқырмандар.

Еске сала кетейік, былтыр тамыз айында EXPO маңына жиналған жұртшылық Тәжікстанның ұйымдастырған ауыл шаруашылығы көрмесінің тас-талқанын шығарған болатын.