Павлодарда 12 жасар қызды зорлаған туысы кәмелетке толмаған және қазір жындыханада жатыр – Насымжан Оспанова
Бұл туралы ол Орталық коммуникациялар қызметінде өткен брифингте айтты
Оқу-ағарту министрлігі балалардың құқықтарын қорғау комитетінің төрағасы Насымжан Оспанова Орталық коммуникациялдар қызметінде өткен брифингте 12 жасында босанған оқушыға қатысты пікір айтты, деп хабарлайды Azattyq Rýhy.
«Павлодар облысында орын алған оқиға, яғни, 12 жастағы қыздың ана атанғаны сирек кездесетін жағдай. Бұл оқиға өте алаңдататын әрі байбалам салатын жағдай. Фактіні мектептің педагогтері байқады. Олар белсенді түрде психологиялық, медициналық қызметті шақырып, әрекет етті. Қылмыстық іс қозғалды. Қыз баланы өз үйінде кәмелетке толмаған жақын туысы 2023 жылдың қазанында зорлаған. Қазір кәмелетке толмаған күдікті психиатриялық ауруханада жатыр. Жағдайды балалардың құқықтарын қорғау комитетінің бақылап отыр», - деді Оспанова.
Оның айтуынша, 12 жастағы оқушы қыз мектепте оқи береді.
«Әрине, оқушы білімін жалғастырады. Психологиялық көмек көрсетіледі, оған педагогтер де атсалысады. Оқушылардың білім алуы Конституциямен қорғалған», - дейді ол.
Естеріңізге сала кетейік, Павлодар облысы Шарбақты ауданында 12 жастағы оқушы қыз туысынан зорлық көріп, аяғы ауыр болған. Павлодар облысындағы бала құқықтары жөніндегі уәкіл Сәуле Шәкенова қыздың үйіне барып, отбасының жағдайын көрген.
