Теміртауда «мектепте жарылғыш зат бар» деп әзілдеп жасөспірім сотталды

Өткен жылдың 6 желтоқсанында Теміртау қаласының Төтенше жағдайлар басқармасына белгісіз біреу қоңырау шалып, қала мектептерінің бірінде жарылғыш құрылғы қойылғанын хабарлаған. Мектептен оқушылар мен оқытушылар шұғыл түрде эвакуацияланды. Тексеру кезінде полицейлер жарылғыш зат таппады, деп хабарлайды Azattyq Ruhy Қарағанды облыстық полиция департаментіне сілтеме жасап.

Теміртау қаласының ПБ экстремизмге қарсы іс-қимыл тобының қызметкерлері «минерді» анықтап, ұстады. Ол сол мектептің 15 жастағы оқушысы болып шықты. Ол сыныптасының ұялы телефонын пайдаланып, дабыл қаққан. Жасөспірімнің айтуынша, ол жай ғана «әзілдеген».

«Дайындалып жатқан терроризм актісі туралы көрінеу жалған хабарлау фактісі бойынша қылмыстық іс қозғалды. Тергеу аяқталғаннан кейін барлық материалдар соттың қарауына жіберілді. Мемлекеттік айыптаушының ұсынысы бойынша сотталушының жасын және оның өкінуін ескере отырып, мәміле түрінде іс жүргізу келісімі жасалды. Үкім шығарылды - бір жыл бас бостандығын шектеу. Сотталған адамға сағат 22.00-ден 6.00-ге дейін тұрақты тұратын жерінен шықпау, пробация қызметтеріне хабарламай тұрғылықты жерін, жұмысын, оқу орнын ауыстырмау міндеттері жүктелді», - делінген хабарламада.

Сондай-ақ оған ойын-сауық орындарына, түнгі клубтарға, барларға, кафелерге, мейрамханаларға, ойын мекемелеріне және алкогольдік өнімдер сататын мамандандырылған дүкендерге баруға тыйым салынады. Сондай-ақ қоғамға жат өмір салтын ұстанатын адамдармен қарым-қатынасты болдырмау қажет.

Осы шектеулер бұзылған немесе жаңа заңсыз әрекеттер жасалған жағдайда шартты мерзім нақты мерзімге ауыстырылуы мүмкін.

Үкім заңды күшіне енді.