Су тасқынына байланысты жолды жапқан Қоянды ауылының алты азаматына қатысты тың мәлімет шықты

Қоянды ауылының алты азаматы ауылдағы су тасқынына байланысты әкімдік алдындағы жолды жапқаны үшін айыппұл алған және соттың шешімімен келіскен. Бұл туралы Azattyq Ruhy тілшісінің сауалына жауап берген Целиноград аудандық сотының баспасөз қызметі хабарлады.

Айта кетейік, бұған дейін біз Қоянды ауылының азаматтары 26 наурыз күні кешке ауылдағы су тасқынына наразылық танытып, әкімдік алдында жиналғанын және Қоянды әкімдігі қыс бойы ауылдағы қарды тазалау үшін миллиондаған теңге бөлгенін жазған болатынбыз.

Белгілі болғандай, Қоянды ауылы құрамына кіретін Целиноград ауданының соты оқиғадан кейін бір күн өте сала, жиынға қатысқандардың ішінен алты азаматтың сотын өткізген. Біздің сұрағымызға жауап берген соттың баспасөз хатшысы сот 27 наурыз күні өткенін жеткізді.

«Сот отырысы 27 наурыз күні өтті. Алты азаматтың барлығы сот отырыстарына келді. Қорғаушыдан бас тартты, себебі кінәларын толық мойындады. Әкімдікке наразылықпен шықтық деп түсіндірді», - деп хабарлады соттың баспасөз қызметінен.

Осылайша, Целиноград ауданының соты Қоянды ауылының «Б.» есімді азаматы заңсыз митинг ұйымдастырғанын, «Н.», «У.», «М.», «Ж.», «К.» атты азаматтар заңсыз митингке қатысқанын анықтап, оларды әкімшілік жауапкершілікке тартқан.   

Олар «Қазақстан Республикасында бейбіт жиналыстарды ұйымдастыру және өткізу тәртібі туралы» Заңның 10-бабының талаптарын бұзды деп айыпталып отыр.

«Сот 30-дан 50-ге дейінгі айлық есептік көрсеткіш мөлшерінде әкімшілік айыппұлдар тағайындады. Сот кәмелетке толмаған балалардың болуын есепке ала отырып, әйелдерге қатысты айыппұл мөлшерін 30%-ға азайтты», - деп хабарлады соттың баспасөз қызметі. 

Сонымен қатар, біздің сұрағымызға жауап берген соттың баспасөз қызметі айыпталушылардың сот шешімімен келіскенін және аппелациялық шағым түсірмегенін хабарлады.