«Қорғануға мәжбүрмін»: Бишімбаевтың бұрынғы әйелі бейнеүндеу жолдады

Қуандық Бишімбаевтың бұрынғы әйелі Назым Кахарман әлеуметтік желіде қазақстандықтарға бейнеүндеу жолдады, деп хабарлайды Azattyq Rýhy.

Назым Кахарман Салтанат Нүкенованың ағасы Айтбек Амангелдінің беделін түсіру мақсатында оған және оның қызына жала жабылғанын мәлімдеді. Бұған дейін желіде «Айтбек Амангелді Қуандық Бишімбаевтың  қызын зорламақ болды» деген ақпарат пайда болды.

«Маған және менің кішкентай қызыма қайтыс болған Салтанаттың ағасының беделін түсіру мақсатында жала жабылды. Сонымен қатар, олар менің сөздерімді емес, өзінің бастығына есеп жазған адамның сөздеріне сүйенген. Адамға жала жабу өте оңай. Содан кейін өзіңнің дұрыстығыңды дәлелдеп көр. Ар-ұждан да, жан да, жүрек те жоқ. (...) Осы нәрсе жүрегіңді жүз есе ауыртады. Енді мен өзімнің және кәмелетке толмаған балаларымның ар-намысы мен қадір-қасиетін қорғау үшін қорғануға және бәрі қалай болғанын айтуға мәжбүрмін. (...) Қандай да бір жын-перілер шоуы өтіп жатыр, соның арасында мені және қызымды отқа лақтырды», – деп жазды Назым Қахарман.

Ол Салтанат Нүкенованың ағасымен таныс та, дос та емес екенін атап өтті.

Бұған дейін қаза тапқан отбасының адвокаты Жанна Уразбахова желіде пайда болған Салтанат Нүкенованың ағасы – Айтбек Амангелдіге қарсы айыптауға жауап берген болатын.

Естеріңізге сала кетейік, Ұлттық экономика экс-министрі Қуандық Бишімбаевтың жұбайы Салтанат Нүкенованың қаза болу фактісі бойынша қылмыстық іс қозғалған болатын.

Салтанат Нүкенованы өлтіру туралы іс сотқа келіп түсті. Оны судья Айжан Құлбаева қарайды. Бұл істің екі қатысушысы нақты не үшін айыпталғаны белгілі болды.