«Көпке бірдей жағу мүмкін емес»: елімізде жұмысшылардың жолды жиі тазалайтынына да шағым түседі

1403 бірыңғай байланыс орталығының мамандарына 24/7 тәулік бойы әртүрлі тақырыппен түрлі адамдар хабарласады. Осылайша Семей қаласының тұрғыны «Семей қ.-Қалбатау а.» бағытындағы жол қызметкерлері  жолды жиі тазалайтынын айтып арызданған, деп хабарлайды Azattyq Ruhy ҚазАвтоЖолға сілтеме жасап.

 Хабарласушы қаладан шыға берісте жанар-жағармай құю бекетінде жолшылардың жолды жиі қардан тазалауы жүргізушілерге кедергі келтіреді дейді.

Уақытылы жолды қардан тазарту әсіресе, қыс мезгілінде  жүргізушілер мен жолаушылар үшін қауіпсіз қозғалыс қамтамасыз ету мақсатында жүргізіледі.

Жолдарды қардан арнайы техниканың көмегімен тазалау кезінде туындауы мүмкін қолайсыздықты ескере отырып, «ҚазАвтоЖол» жолшылары көлік қозғалысы мейлінше аз  уақытта, мысалы, түнде немесе таңғы уақытта жұмыс жасайды.

«Өз тарапымыздан хабарласқан адамға өтініші үшін алғыс айтамыз және жолшылардың жұмысына түсіністікпен қарауыңызды сұраймыз, өйткені республикалық маңызы бар автожолды уақытылы қардан тазарту барлық жол қозғалысына қатысушылардың қауіпсіздігі үшін қажетті шара екенін ескерген жөн», - делінген хабарламада.