СҚО-да 50 шақты ауыл жарықсыз қалды

Солтүстік Қазақстан облысында 50-ден астам ауылда әлі күнге дейін жарық жоқ. Қазір мамандар жеті ауданда электр желілерін қайта қалпына келтіру жұмыстарымен айналысып жатыр, деп хабарлайды Azattyq Ruhy Хабар24 телеарнасына сілтеме жасап.

46 бригада жасақталып, 180-нен астам техника жұмылдырылды. Энергетиктердің айтуынша ахуал әсіресе Мағжан Жұмабаев ауданында күрделі. Естеріңізге сала кетейік, өткен демалыс күндері өңірде қар аралас жауын жауып, арты боранға ұласты. Қатты желдің салдарынан элект сымдары үзіліп, бағандар құлаған еді. Қазір кей ауылдарға қуат Ресей және Ақмола облысынан тасымалданып жатыр.

«Өңір тұрғындарын сумен қамтып отырған кәсіпорын қызметкерлері күшейтілген жұмыс кестесіне көшті. Халыққа тіршілік нәрі беріліп жатыр. Қазір 55 ауылда әлі жарық жоқ. Энергетиктер ертең сағат 15-00-ге дейін бар шаруаны аяқтаймыз деп сендіріп отыр», - деді облыстық энергетика және тұрғын үй-коммуналдық шаруашылығы басқармасы басшысының міндетін атқарушы Владислав Лукин.