Ақтөбе облысының шаруа қожалығында малдан қарасан ауруы анықталды

Ақтөбе облысы Ойыл ауданындағы шаруа қожалықтардың бірінде 6 малдан қарасан ауруы анықталды. Осыған байланысты карантин енгізілді: 30 күн ішінде шаруашылыққа мал әкелуге және сол жерден әкетуге болмайды, деп хабарлайды Azattyq Ruhy Диапазонға сілтеме жасап.

8 қарашада шаруа қожалықтағы 6 бас малдың жағдайы нашарлай түскен. Ветеринарлық зертханада оған қарасан ауруы себеп болғаны анықталды. Бұл аурудан малдың буындары мен бұлшықеттері зардап шегеді.

«Самғат» ШҚ Амангелді ауылынан 6 шақырым жерде орналасқан. Ақтөбе облысының ветеринария басқармасының бас маманы Алдияр Арсланбек жергілікті тұрғындардың малын жұқтыру қаупі жоқ деп сендірді.

Шаруа қожалықта 325 бас ірі қара мал және 576 бас ұсақ мал бар. Олар вакцинацияланды, мал ұсталатын үй-жайларда дезинфекция жүргізілді.