Павлодар облысындағы мектептердің бірін бір-ақ түлек бітірді

Павлодар облысында бір ғана түлек мектеп бітірді, деп хабарлайды Azattyq Ruhy.

Еуразия бірінші арнасының хабарлауынша, Төртқұдық ауылдық мектебінің оқушысы болған Данияз Төребаев – өз мектебінің биылғы жалғыз түлегі.

«Жалғыз оқыған қиынырақ екен. Бірақ қалай болғанда да, үй тапсырмасын орындап, сабақтан қалмай жүресің, қашып кету мүмін емес, сабақта толық отыруға тура келеді», - деп әзілдейді Данияз.

Данияз Төребаевтың мектеп бітірген сәтін көруге барлығы 26 оқушы келді.

Төртқұдықтағы мектеп ұжымында 12 мұғалім жұмыс істейді. Оның 10-ы осы мектептің түлегі. Олар жоғары білім алып, туған жеріне оралған. Данияздың сынып жетекшісі – оның үлкен ағасы Ниязбек. Дегенмен одан оқу жеңілдеп кеткен жоқ дейді ол. Мектептің жалғыз түлегі оқуын Павлодарда жалғастырмақ. Жас жігіт мамандық таңдау оңай болмағанын айтады.

«Мен Павлодарға ПМПИ-ге түсіп, спортпен, дзюдомен айналысып, спор шебері, дене шынықтыру мұғалімі болғым келеді», - дейді түлек.

Бозбала мұғалім мамандығын игерген соң, міндетті түрде қара шаңыраққа оралатынын айтады.