Оралдағы «Арай» комьюнити орталығы жақсы жаңалықтарымен қуантуда

Жуырда Батыс Қазақстан облысының әкімі Ғали Есқалиев және шаһар басшысы Миржан Сатқанов бастаған топ Орал қалалық мәдени-ағарту бірлестігіне қарайтын «Арай» комьюнити орталығында болды және қалалық орталықтандырылған кітапханалар жүйесінің №16 филиалында болып, жұмысымен танысты.

Қаланың «Ет комбинаты» деп аталатын ескі ауданында орналасқан мәдениет ошағына жергілікті тұрғындар жиі барады. Мұнда жұмыс кестесіне сәйкес, қолы бос мектеп оқушылары, қариялар мен өзге де келушілер алаңсыз кітап, газет-журнал оқып, интернет желісіне тегін кіре алады.  

«Арай» комьюнити орталығының жетекшісі Райымбек Самигуллиннің айтуынша, мұнда мектеп оқушыларының бос уақытын тиімді пайдалану үшін түрлі бағыттағығы үйірмелер ұйымдастырылған. Үйірмелердегі сабақтар балалардың бойында өзін-өзі жетілдіру, топта жұмыс істеу, өзгелердің қызығушылықтары мен пікірлерін ескеру, санасу, тыңдау қабілетін дамытады.

«Жақында орыс тілді азаматтарға қазақ тілін үйрететін үйірме ашылды. Алдағы уақытта мұнда өзге ұлт өкілдерін көптеп тартқымыз келеді. Тағы бір пайдалы үйірме «Smart» деп аталады. Бұл үйірмеге заманауи гаджеттерді, ұялы телефон бағдарламаларын жеткілікті дәрежеде пайдалануды білмейтін зейнет жасындағы тұрғындар қатысады. Біз оларды осында түрлі бағдарламаларды қолдануға үйретеміз. Яғни, олар интернеттегі алаяқтардан қалай қорғану керектігін біледі», – деді Р.Самигуллин өңір басшысына.

«Мұндай орталықтар бізге ауадай қажет. Өйткені, бізде дарынды балалар көп. Жастардың спортқа, шығармашылыққа деген ұмтылысын қолдауға баса назар аударып, олардың күш-жігері мен қызығушылығын дұрыс, пайдалы бағытқа бағыттау өте маңызды. Бүгінде тұрғындар мұндай орталықтардың санын көбейтуді сұрап отыр. Бұл мәселеде атқарушы органдар тек қана бюджет қаржысына иек артпай, бизнес өкілдерімен өзара тиімді байланыста жұмыс істеуі керек», – деп қадап айтты облыс әкімі Ғали Есқалиев. Сондай-ақ, өңір басшысы орталықтағы қолөнер шеберлері көрмесімен танысты.

Айта кетерлігі, Орал қаласының мәдени-ағарту бірлестігінде барлығы 24 филиал бар. Оларды ішінде 11 аула клубы, 8 мәдениет үйі, 104 клуб. Оларға келушілер саны 2300 адамнан асты. Жоғарыда аталған үйірмелердің 84-і тек балаларға арналған. Екі мыңға жуық бала түрлі үйірмелерге белсене қатысады.