«Тәуелсіздіктің 30 жылдығына орай»: ШҚО-да журналистерді тозығы жеткен ғимаратқа көшіріп жатыр

«Шығыс ақпарат» медиа-холдинг қызметкерлері бір ғимараттан екіншісіне көшуге бас тартып отыр. Облыс әкімдігі журналистерді Тәуелсіздіктің 30 жылдығы қарсаңында «жаңа ғимаратқа көшесіңдер» деп ескерткен екен. Алайда, «жаңа» деп отырған нысанның салынғанына бір ғасырға жуықтаған деп хабарлайды Azattyq Ruhy тілшісі.

Медиа-холдинг ұжымы соңғы жиырма жылда ескі балабақшаның ғимаратында жұмыс істеп келген. Олар «Тәуелсіздікке тарту» дегенде көзге ең алдымен жаңа ғимарат, іші жаңа жиһазға толған кеңсе елестегенін айтады. Алайда, едені шұрық тесік, қабырғалары ылғалдан көгеріп кеткен ғимаратты көргенде есеңгіреп қалыпты.

«Біз отырған ғимаратта бірнеше газет және баспахана жұмыс істейді. Ал, медиа-холдингтің құрылтайшысы Шығыс Қазақстан облыстық Ішкі саясат басқармасы таяу уақытта ғимаратты босатуды талап етеді. Тіпті, бұйрық шықты. Олар Өскеменде балалар көп, балабақша жетіспейді деп сендірді және облыстың бас басылымының ғимаратын алуға ниетті. Ал, басылым қызметкерлері ғасыр бұрын салынған ғимаратқа көшірілмек. Олар жөндеу жұмыстарын жасайды дейді, бірақ ғимаратта дымқыл. Қанша жөндеу жүргізсе де, ол ылғал кетпейді. Мұндай жағдайда жұмыс істеу адам денсаулығына зиянды», - дейді медиахолдинг қызметкерлерінің бірі.

Медиа-холдинг құрамына облыстық «Дидар» газеті кіреді. Редакция ұжымы әкімдіктің журналистерге жасаған осынау «сыйлығына» наразылығын білдіріп отыр. Олардың айтуынша, тозығы жеткен ғимаратқа ұжым толығымен сыймайды.

«Басыңнан бақ тайса... БАҚ қара шаңырағының басынан бақ тайғалы жеті жыл болды. Жеті жылда жеті басшы ауысып, жылда бір дау шығып тұратын. Ал, енді Тәуелсіздіктің 30 жылдығына "тамаша тарту" жасап отырған құрылтайшымызға "алғыстан" басқа айтарымыз жоқ. Ғасырлық тарихы бар қос газеттің қызметкерлеріне ғасырлық ғимараттан "үйшік" сыйлап отыр», - деп жазады Шығыс Қазақстан облыстық «Дидар» газетінің жауапты хатшысы Тілеукен Әлжікеев өзінің Facebook- парақшасында.

Аталған мәселе әлеуметтік желіде әлі де қызу талқылануда. Желі қолданушылары облыс әкімдігінің бұл шешімін БАҚ өкілдеріне деген құрметсіздігі деп бағалауда.

Айта кетейік, бұған дейін «Шығыс ақпарат» медиа-холдингінің қызметкерлері екі ай бойы жалақы алмағанын айтып шу шығарған еді.

Таунар Қайратұлы ШҚО