Бүгіннен бастап екпе салдырмаған бірқатар кәсіпорын қызметкерлері жұмысқа кіргізілмейді
Қазақстанның бас санитар дәрігерінің қаулысы күшіне енді
Бүгіннен бастап екпе салдырмаған бірқатар кәсіпорын қызметкерлері жұмысқа кіргізілмейді, деп хабарлайды Azattyq Rýhy.
Енді вакцина алмаған қызметкерлер аптасына бір рет ПТР тест тапсыруға міндетті болады. Бұл талап медициналық анықтамасы барлар мен соңғы 3 айда коронавируспен ауырғандарға қатысты емес.
Еске сала кетейік, халықты жаппай вакциналау елде ақпан айынан беріп жүріп жатыр. Денсаулық сақтау министрлігі ұжымдық иммунитет қалыптасуы үшін 10 млн адам егілуі керек деген. Соңғы деректер, бойынша Қазақстанда 6,8 млн адам вакцина алды.
«6 қыркүйектен бастап облыстардың, Алматы, Нұр-Сұлтан, Шымкент қалаларының әкімдері, орталық мемлекеттік органдар, құқық қорғау және арнайы органдар, "Атамекен" ҰКП (келісу бойынша), ұлттық компаниялар, меншік нысанына қарамастан заңды тұлғалар COVID-19-ға қарсы вакцина алмаған жұмыскерлерді (тұрақты медициналық қарсы көрсетілімдері бар және соңғы 3 ай ішінде COVID-19-бен ауырып жазылған адамдарды қоспағанда) бетпе-бет режимде жұмысқа жіберуді шектесін», - делінген қаулы мәтінінде.
Ал қызмет көрсету саласының вакцина салдырмаған қызметкері бәрібір де жұмыс орнында болғысы келсе, онда міндетті түрде ПТР-тестілеуден (7 күнде бір рет) өтуге тиіс.
