200 мың қазақстандыққа Ashyq қосымшасында «жасыл» мәртебе берілді

Цифрлық даму, инновациялар және аэроғарыш өнеркәсібі министрі Бағдат Мусин Ashyq қосымшасында вакцина салдырған 200 мың қазақстандыққа «жасыл» мәртебе берілгенін мәлімдеді.

«Вакцина алған 200 мың азамат Ashyq қосымшасында «жасыл» статусқа ие болды. Осылайша екпенің екі компонентін алған барлық кісіге аптаның соңына дейін тиісті мәртебені беруді жоспарлап отырмыз. Баршаңызға амандық тілейміз!», - деп жазды ол.

Ashyq –  қоғамдық орындарға баратын адамдарды тіркеуге арналған қосымша. Нысанға кірмес бұрын пайдаланушы арнайы QR-кодты сканерлейді де, оны кіреберісте тұрған әкімшіге көрсетеді. Код келушінің статусын анықтайды. Ал азаматтардың статусы денсаулық сақтау министрлігіндегі мәліметтер базасымен салыстырғаннан кейін белгілі болады.