Жыл басынан бері 4 мыңға жуық этникалық қазақ қандас мәртебесін алды
Олар негізінен Алматы, Түркістан, Маңғыстау облыстары мен Шымкент, Нұр-Сұлтан қалаларына қоныстанған
2021 жылдың басынан бері 4 мыңға жуық этникалық қазақ қандас мәртебесін алды, деп хабарлайды Azattyq Rýhy Еңбек және халықты әлеуметтік қорғау министрлігіне сілтеме жасап.
2021 жылғы 1 сәуірдегі жағдай бойынша, 3 966 адам тарихи отанына келіп, қандас мәртебесін алды. Жалпы 1991 жылдан бері республикаға шамамен 1 млн 74,3 мың этникалық қазақ оралды.
Осы жылдың басынан бастап Қазақстанға келген қандастардың жартысынан астамы (75,6%) Өзбекстаннан, 11,9% – ҚХР-дан, 5,8% – Түркіменстаннан, 3,0% – Моңғолиядан және 3,6% – басқа елдерден.
Келген этникалық қазақтар негізінен Алматы (32,6%), Түркістан (16,5%) және Маңғыстау (14,2%) облыстарына, сондай-ақ Шымкент (12,0%) және Нұр-Сұлтан (5,4%) қалаларына қоныстанды.
Ағымдағы жылғы 1 сәуірдегі жағдай бойынша, еңбекке қабілетті жастағы этникалық қоныс аударушылар саны 59,9%-ды, еңбекке қабілетті жастан кіші 24,1%-ды және зейнеткерлер 16,0%-ды құрайды.
