ШұғылҚазақстанда өткен тәулікте 857 адамнан коронавирус инфекциясы анықталды

Елордалық дәрігерлер қала тұрғындарына үндеу жасады

Ауруханада науқастар саны көбейген

фото: astana.gov.kz

Коронавируспен күресте алдыңғы шепте жүрген елордалық жұқпалы аурулар мамандары қала тұрғындарын санитарлық-эпидемиологиялық нормаларды сақтауға шақырды.

Коронавируспен ауруханаға түсушілердің көбеюін ескере отырып, медицина қызметкерлері карантин режимін сақтау бойынша алдын-алу шараларын ұмытпау керектігін еске салды.

«Күзде науқас саны аз болды. Тіпті, кейбірі вирус тоқтады деп те ойласа керек. Бірақ инфекция түбегейлі жойылған жоқ. Коронавирус үдеп тұрған шақта күн мен түнді айыра алмаған кезіміз болды. Уақытқа қарап, қай шақта жұмыс істеуіміз керектігін ойлаған жоқпыз. Коронавирустың күрт өршуі мен таралуының қайталануына жол бермеуіміз керек. Кейбірі қала ішін бетпердесіз аралап, санитарлық нормаларды елемей жатқандары бар. Ал біз мұнда күн сайын науқастардың денсаулығы мен өмірі үшін күресіп жүрміз», - дейді қалалық жұқпалы аурулар орталығының дәрігері.

Стационарда коронавирустан емделіп жатқан Әйгерім Өміржанова ауруханадан бір-ақ шығатынына сенбеген екен.

«Бұл қауіпті вирустың елімізге зиян тигізгеніне бір жылға жуық уақыт болды. Осы уақыт ішінде мен алаңсыз жүріп, денсаулығым туралы ойлаған емеспін, вирус жоқ деп те ойладым. Бірақ өзімді нашар сезінген сәттен бастап бірден медициналық көмекке жүгіндім. Өкінішке қарай, менен коронавирус шықты. Шынымды айтсам, мұндай жағдайға тап боламын деп ойламаған едім. Бұл ешқандай да әзіл емес екен», - деп ойымен бөлісті ол.