Сәбина Алтынбекова тұрмысқа шықты

Қазақстандық волейболшы Сәбина Алтынбекова тұрмысқа шыққаны жайлы қуанышты хабарын бөлісті. Спортшы неке қию рәсімі кезінде түсірілген суретті әлеуметтік желідегі парақшасында жариялады.

«Жылды ең керемет ер адамның әйелі ретінде аяқтаймын», - деп жазды ол.

Спортшы жариялаған фотодан екі жастың некесін «Нұр-Мүбəрак» университеті жанындағы мешіттің бас имамы Қайрат Жолдыбайұлы қиғанын аңғаруға болады. 

Еске сала кетсек, қазақстандық волейболшы Сәбина Алтынбекова 2014 жылы жастар арасындағы Азия чемпионатынан (Тайбэй қаласы - ред.) кейін желіде «ең сымбатты» спортшы ретінде танылды. Ол 1996 жылы Ақтөбе қаласында дүниеге келген. 17 жасында Қазақстанның волейболдан әйелдер құрамасының мүшесі атанды.