Түркістан қаласының жаңа әуежайына тұрақты рейстер ашылды

Нұр-Сұлтан мен Алматыдан Түркістан қаласының жаңа әуежайына рейстер ашылды. Бұл туралы Индустрия және инфрақұрылымдық даму министрлігінің баспасөз қызметі хабарлайды.

«Азаматтық авиация комитеті Түркістан қаласының әуежайына тұрақты рейстер ашу бойынша жұмыс жүргізуде. Бастапқы кезеңде Нұр-Сұлтан және Алматы қалаларынан Түркістанға күн сайын рейстер орындау жоспарланып отыр. Рейстерді FlyArystan, SCAT және Qazaq Air сынды қазақстандық 3 компания орындайды», - делінген ақпаратта.

FlyArystan әуе компаниясы бүгіннен бастап жоғарыда көрсетілген бағыттар бойынша билет сатуды бастады. Fly Arystan рейстеріне билет бағасы Нұр-Сұлтан және Түркістан қалалары арасында 6999 теңгеден және Алматы мен Түркістан қалалары арасында 5999 теңгеден басталады.

Нұр-Сұлтан – Түркістан – Нұр-Сұлтан бағыты бойынша алғашқы рейс 2020 жылдың 1 желтоқсанында орындалады.