Жексенбіден бастап Павлодар облысында карантин күшейтіледі

Павлодар облысының бас санитар дәрігері Батырбек Әлиев коронавирустың таралуының алдын алу мақсатында өңірде карантин шараларын одан әрі күшейту туралы қаулы қабылдады.

18 қазан сағат 00-ден бастап күшіне енетін қаулыға сәйкес, бірқатар нысанның жұмыс кестесіне өзгеріс енгізіледі.

Құжатта ғимарат ішіндегі қоғамдық тамақтану орындарына (ашық ауада қызмет көрсетуді қоспағанда) сағат 08.00-ден 22.00-ге дейін жұмыс істеуге рұқсат берілетіні көрсетілген. Бұл ретте, нысанның толымдылығы 30 орыннан аспауы, әлеуметтік арақашықтық және үстелдер арасындағы 2 метр қашықтық, бір үстел басына 4-6 адамнан отырғызу талаптары сақталуы тиіс.

Ұжымдық, салтанатты, отбасылық, және басқа да іс-шараларға тыйым салынады.

Азық-түлік дүкендерінің жұмыс уақыты сағат 22.00-ге дейін ғана рұқсат беріледі.

Фитнес-орталықтардың, жаттығу залдары мен спорттық-сауықтыру орталықтарының қызметтері 30 пайыздық толымдылықпен сағат 08.00-ден 20.00-ге дейін жүргізіледі.

Сауда орталықтарының, сауда үйлерінің, сауда желілерінің жұмыс уақыты сағат 18.00-ге дейін ғана болады.