Пандемия кедергі емес: қазақстандық шенеуніктер Жаңа жылға қызу дайындалып жатыр

Azattyq Rýhy пандемияға қарамастан, Жаңа жыл қамын жаздан ойлаған мемлекеттік мекемелер туралы жазады.

Қазақстан коронавирус пандемиясының екінші толқынына дайындалып жатыр. Жаман айтпай жақсы жоқ, Премьер-министр COVID-2019 вирусының екінші толқыны болса да, болмаса да, бүкіл әкімдер мен меморган басшыларын 15 қазанға дейін кез келген жағдайға 100% дайын отыруды тапсырды.

Осылайша, бас мінберлерден тек эпиджағдайға ғана қатысты болжам айтылып жатқанда, аймақтардағы мекемелер мемлекеттік сатып алу сайтында Жаңа жылға қызу дайындалып жатыр. Айтпақшы, пандемия басталғалы өңірлер дәрі-дәрмек сатып алу үшін бюджеттен 16 млрд теңгеден астам қаражат сұраған. Оның жартысы, яғни 8 млрд теңгеден астам қаражат вирустың екінші толқыны болса, қалғаны ай сайын 60 мың адамды дәрімен қамтамасыз ету үшін бөлінген.

1 ШЫРША – 700 МЫҢ ТЕҢГЕ

Ел іші маусым-шілде айларындағы өлім-жітімнен енді ес жиып жатқанда, Қарағанды әкімдігіне қарасты №23 орта білім беретін мектептің директоры жаңа жылға дайындала бастаған. 17 тамыз күні мемлекеттік сатып алу сайтында лот жариялаған мектеп директоры Нүркен Ашықбаев бір шыршаны сонау Түркістан қаласындағы жеке кәсіпкерден 717 285 теңгеге сатып алған. Мектептің талабына сай, енді «Күкенова» жеке кәсіпкерлігі Қарағандыдағы мектепке биіктігі 7 метр шырша әкеледі. Жаңа жылға дейін әлі үш ай уақыт барын ескерсек, жеке кәсіпкер конкурс талабын орындап үлгеруі тиіс.

Батыс Қазақстан облысындағы Бөрлі ауданының мектебі де Жаңа жылға қызу дайындалып жатыр. Олар сатып алу сайтында шыршаны әдемілеп әрлеу үшін бір емес бірнеше лот жариялаған. Бірақ, қыркүйектің соңғы күні аяқталған конкурста жеңімпаз жоқ. Енді сатып алу «бір көзден» өтеді, яғни, мектеп керек-жарағының бәрін бір кәсіпкерден ғана сатып алуға құқылы деген сөз. Жалпы, мектеп басшылығы шыршаның төбесіне ілетін бір жұлдызды 105 мың теңгеге, ал, «жылтырақтарды» 10-20 данадан сатып алуға дайын.

Қарағанды қаласында №2 арнайы мектеп-интернаты болса акт залына сахна орнату үшін 3 млн 200 мың теңге бөлген. Бұл конкурс та жуырда ғана аяқталды, жеңімпаз жергілікті жеке кәсіпкерліктің бірі.

Жалпы, бұл арқасында ақауы бар, яғни, жүріп-тұруы қиын, жұлыны бос балалардың денсаулығын түзетіп, оларға білім беретін мекеме. Директоры – Гүлнәр Қырғызбаева. Сатып алу қыркүйек айының ортасында өткен. Мемекеме жыл басынан бері 21 млн теңгеден астам салық төлеген.

ӘКІМДЕРДІҢ «ЭСТЕТИКАЛЫҚ» ТАЛҒАМЫ ҚАНДАЙ?

Балқаш қаласының әкімдігіне қарасты тұрғын-үй шаруашылық жөніндегі бөлім қаланы қысқа дайындап жатыр, «эстетикалық» әдемілігі жағынан. Сатып алу сайтындағы конкурс күні кеше, 5 қазан күні аяқталды. Өтінімдер қаралып жатыр. Әкімдіктің талабы көп, ең алдымен, жеңімпаз әкімдік бекіткен эскизбен ғана жұмыс істейді. Сонымен қатар, қаланы Жаңа жылға орай безендіру үшін қолданатын құралдары 30, 40, тіпті 50 градус аязға шыдамды болуы шарт. Жалпы, бір арка және үш жарық құралы үшін әкімдік 13 млн теңге төлеуге дайын.

Айтпақшы, Талдықорған қаласының әкімдігі де осыған ұқсас бірнеше конкурс өткізді. Тамызда басталған конкурс 28 қыркүйекте аяқталғанмен, жеңімпаз әзірге белгісіз, себебі, «өтінім толықтырылып жатыр». Жалпы, «қаланың орталық бөлігін жарықпен көркемдеп және диодты, флекснеонды безендіруін ағымды жөндеу» үшін Талдықорған әкімдігі 10 млн теңге бөлген.

Нұр-Сұлтан қаласының Байқоңыр ауданындағы шенеуніктер де қар түспей жатып, қаланы безендіруге кіріскен. Аудан әкімдігі бір  «эстетикалық сұлулық» үшін бір ғана қызмет түріне 18 млн теңгеден астам қаражат бөліп отыр. Сатып алу тамызда өткен, конкурста «LED Impress Lighting» жауапкершілігі шектеулі серіктестігі жеңімпаз атанды.

Бір сөзбен айтсақ, бүкіл әлем ертеңгі жағдай қандай болады деп, карантиннің екінші толқынына қамданып жатқанда, Қазақстанның әкімдері мен мектеп директорлары жаңа жылға қандай жарық ілеміз дегенге алаңдап отырған сыңайлы. Алаңдағаны соншалық, мемлекеттік сатып алулар сайтынан көріп отырғанымыздай, олар шырша мен гирляндтарды шілде-тамыздан бастап сатып алған.

Ал, Павлодар қаласының әкімдігі шаһарды жаңажылдық стильде безендіру үшін қазынадан 14 миллион 196 мың теңге бөлген. Бұл қаражатқа қаланың әр бөлігіне 58 шырша орнатылады. Павлодардың басты шыршасына 100 метр гирлянд оралып, 109 қуыршақ ілінеді. Сонымен қатар, қалада жалпы ұзындығы 1 710 метр болатын жарық шамдар ілінеді.

Павлодар әкімдігі бұл конкурсты биыл 29 қыркүйекте жариялаған. 

Түркістан облысы Мақтаарал ауданында Жаңа жылға дайындық басталмағанымен, аудан әкімі өзіне су жаңа автокөлікке тапсырыс беріпті. Биыл жазда ауданды су басып, 620 үйді шайып кеткен болатын. Қазір аудандағы бірнеше ауылда жаңа үйлер бой көтеріп, халық қалыпты тіршілігіне қайта оралған. Әкімнің көлігі құрылыс басында жүріп тозды ма, әлде ол өзіне сый жасағысы келді ме, әйтеуір 10 миллион 190 мың теңге тұратын автокөлікке тапсырып берген. Қызығы сол, сатып алынатын көлікте кішкентай баланың орындығына лайықты механизм болу керек. Әкімге оның не керегі бары әзірге түсініксіз. Бәлкім немересін қызметтік көлікпен балабақшаға тасымалдағысы келді ме?

Аталған байқау мемлекеттік сатып алулар порталына 28 қыркүйекте ілінген. Келесі күні-ақ оған қатысуға «Hyundai Trans Kazakhstan» ЖШС құжат тапсырған. Біздің болжам бойынша аудан әкімі енді Hyundai Tucson автокөлігімен жүруі мүмкін.

Айта кетейік, қазақстандық қоғамда пандемияға дейін де Жаңа жыл мерекесін атап өту мәселесі қызу талқыланады. Қоғам белсенділері мен әлеуметтік желі қолданушылары аталған мейрамға дайындықты Тәуелсіздік күнінен кейін ғана бастау керек деген пікірде. Сондай-ақ, жаңажылдық безендірулерден бас тартып, оған жұмсалатын қаражатты әлеуметтік жағдайы төмен отбасылардың балаларына жылы киім алуға жұмсау қажет деген пікірді жыл сайын айтады. Десе де, әкімдердің бұл пікірлерге құлақ асқанын сирек байқаймыз. Тіпті, пандемия кезінде де атқамінерлер шырша мен жылтырақтарға миллиондап қаражат жұмсап жатқанына осы мақала дәлел.

Кенжекей Тоқтамұрат, Нұр-Сұлтан