Алматы облысында ата-аналар әкімдіктен ақша талап етті

Алматы облысында ата-аналар әкімдіктен ақша талап етті. Ақсу ауданы тұрғындарының сөзінше, әкімдік оқу жылының басталуына байланысты әр отбасыға бір реттік көмек ретінде 30-40 мың теңгеден беруі керек екен. Ал аудан басшылары мемлекет тарапынан мұндай ақшаның қарастырылмағанын халыққа түсіндіре алмай келеді, деп хабарлайды Azattyq Rýhy тілшісі.

Аудандық әкімдік пен білім бөліміне көмек сұрап барған адамның бірі – Меруерт Орынбаева. Ол мемлекеттен ай сайын атаулы әлеуметтік көмек ретінде 38 мың теңге алады. Мектепте күзетші болып жұмыс істейтін күйеуінің табысы – 58 мың теңге. Бұл ақша отбасының күнкөрісіне жетпеген соң, кез келген көмекке зәру.                 

«Үш баланың анасымын. Өзге облыстарда «Мектепке жол» акциясы аясында аз қамтылған отбасылар мен көпбалалы жанұяларға оқушылардың оқу-құралдарына деп 30 мың теңгеден бөлініп жатыр екен. Енді біз жұма күні аудан әкіміне жиналып барып, осы көмектің бізге де берілуін сұрадық. Әкім дүйсенбі күні шешеміз деп шығарып салған. Кеше тағы жиналып келсек, «бізде ондай артық ақша жоқ. Ақсу ауданы кедей, көмек берілмейді» дейді. Не істеу керек екенін әкім білім бөлімінен сұрады, білім бөліміндегілер әкімдіктің өзінен сұрап, ақыры түк жоқ, тарастық», - дейді І.Жансүгіров ауылының  тұрғыны Меруерт Орынбаева.

Бала бағумен үйде отырған Назгүл де өзі сияқты әйелдермен бірге әлеуметтік желіде жарияланған ақпараттарды жіті қадағалап отырады. Төрт баласына мемлекеттен ай сайын 44 500 теңге және атаулы әлеуметтік көмек ретінде 30 мың теңге алады. Тұрмысы нашар тұрғындарға 40 мың теңгеден таратылатыны туралы ақпаратты тағы да осы әлеуметтік желіден көрген. 

«Нұр-Сұлтан мен Алматыда аз қамтылған отбасыларға деп 40 мың теңгеден берілетін болыпты. Бір реттік көмек неге бізге де берілмейді? Сол қаладағы ата-аналар көмек ақшаны алдық деді. «Мектепке жол» акциясы аясында берілген көмек ақшаны біз неге көрмейміз? Ай сайын мемлекеттен 74 500 теңге аламын. Ол ақша жетпейді. Жұма күні 20 әйел жиналып әкімдікке бардық. Дүйсенбі күні 13 адам тағы жиналдық. Бірақ әкімдік мәселені сол қалпы шеше алған жоқ», - дейді Назгүл Разахова. 

Көмек сұрап барған аналардың мәселесін тыңдаған әкімдік өкілдері, оларға «Үйде отырмай қызылшаға жұмысқа шығыңдар» деген. Қаржы таратуға ауданның қауқары жетпейді, өңірде өндіріс пен түсім әкелетін зауыт аз екенін айтып шығарып салған көрінеді.

«Аудан әкімінің орынбасары Ғазиз Отарбайұлы бізге «Егін егіңдер, қызылшаға шығыңдар» деді. Жер берсін, жұмысқа шығайық. Қызылшада жұмыс істеп жүрген жұмысшылар айлап еңбекақыларын ала алмай жүр. Сонда бұл әкімнің бізді кекеткені ме?! Күнімізді әрең көріп жүрміз, расын айтсақ. Басшылардың айтатыны «Аудан кедей, ауданда ештеңе жоқ». Әкім орынбасары үнемі дөрекі жауап береді. Өздерінің жағдайы біздің басымыздағыдай болса, көрер едік.», - деп шағымданды ашулы ата-аналар.

«Жалғызбасты анамын. Қызым биыл 4 сыныпқа барады, озат оқушы. Екінші ұлым да биыл мектепке барады. Онлайн оқуға телефон немесе компьютерлері де жоқ.  Жағдайымыз нашар, көмектессеңіздер. Мына бір реттік көмек ақшаны бізге де беретіндей жоғарыдағыларға жеткізіп, айтыңыздаршы», - дейді Ақсу ауданының тұрғыны Эльмира Құсманова. 

Суретте: Алматы облысы Ақсу ауданының әкімі Есім Базарханов

Ал Ақсу ауданы әкімдігінің хабарлауынша, ондай ақша мемлекеттен қарастырылмаған. Әр облыс өздерінің қорларына жиналған ақшаны қайда жұмсау керектігін өздері шешеді. Ақсу ауданында  қырық мыңнан астам халық тұрады. Олардың ішінде тек 323 баланың ата-анасы атаулы әлеуметтік көмек алады. Оларға қырық мың теңге берілмейді, есесіне жағдайы нашар отбасындағы оқушыларды киім-кешек, өзге де қажетті заттармен қамту үшін бюджеттен 8 млн 75 мың теңге бөлінген.

«Ақсу ауданы Жансүгіров ауылындағы Қ.Сәтбаев, Ж.Сыдықов, Е.Сиқымов мектебінің ата-аналары аудан әкіміне келіп, мектеп құралдарын сатып алу үшін өздеріне 40 мың теңгеден беруін талап етті. Сәуір айындағы мәслихаттың шешімімен, Ақсу ауданы білім бөліміне қарасты мектептер ішінде атаулы әлеуметтік көмек (АСП) алатын 323 балаға республикалық бюджеттен 8 млн 75 мың қаражат бөлінген. Бөлінген қаржыны мақсатты жұмсау үшін әр мектептен ата-аналардың келісімімен оқушыларға қажетті киім-кешек алу сұраныстары жиналды.

Мектептерден алынған сұраныстар негізінде мемлекеттік сатып алу порталына жоғарыда аталған киім-кешектерді алу үшін хабарлама беріліп, жеңімпаздар анықталды. Ақмола оқу-өндірістік кәсіпорны ЖШС 290 мың теңгенің, «Қазақ соқырлар қоғамы» 7 млн 430 мың теңгенің,  «Гауһар» тігін фабрикасы 354 мың теңгенің тендерін ұтып алды. Енді олар осы ақшаның негізінде оқушыларды қажетті заттармен қамтамасыз етеді», - деді Алматы облысы Ақсу ауданы әкімінің баспасөз хатшысы  Мағжан Шындәулет. 

Әмірболат Құсайынұлы, Алматы