Елордада 25 мыңнан аса бала 1-сыныпқа барады

Жаңа оқу жылында елордада бірінші сыныпқа 25 мыңнан астам оқушы қабылданады. Құжаттарды қабылдау egov.kz электрондық үкімет порталы арқылы және қағаз форматында жүргізіледі, деп хабарлайды Azattyq Rýhy тілшісі Нұр-Сұлтан қаласы әкімдігінің ресми сайтына сілтеме жасап. 

«Бүгінгі таңда бірінші сыныпқа 21 406 өтініш беріліп, 16 123 өтініш қабылданды»,- деп хабарлады Білім басқармасы.

Естеріңізге сала кетейік, оқу жылы 1 қыркүйектен бастап барлық елордалық мектептер (1-11 сыныптарда) мен колледждерде қашықтықтан басталады.

Бұл ретте бастауыш буын оқушылары үшін (1-4-сыныптар) «кезекші сыныптардың» жұмыс істеуі жоспарланып отыр. Яғни, ата-аналардың өтініші бойынша, жағдай болған жағдайда, қатаң санитарлық нормаларды сақтай отырып, «кезекші сыныптар» ашылады. Оқыту бірнеше ауысыммен ұйымдастырылады.

«Сыныптар кіші топтарға бөлініп жинақталады. Осы кіші топтардағы балалар саны 10-15 адамнан аспайды деп жоспарлануда. Сабақтар бір кабинетте өтеді, әр уақытта өзгерістер болады. Сонымен қатар, пәндердің бір бөлігі қашықтықтан жүргізіледі», – деп атап өтті Білім басқармасынан.

Бұл ретте барлық санитарлық нормалар қатаң сақталады.

Бұған дейін хабарланғандай, Нұр-Сұлтанда 12 мыңнан астам педагог (мектеп, колледж, балабақша тәрбиешілері) қашықтықтан оқытуды ұйымдастыру бойынша онлайн-курстардан өткен. Балалар, ата-аналар және балабақша қызметкерлері үшін жұмыс алгоритмдері жасалды. Барлық нысандар санитарлық талаптарға сәйкес дайындалған.