Қазақстанда 244 еріктіге коронавирусқа қарсы вакцина салынады

Коронавирустың таралуына қарсы ведомствоаралық комиссия Биологиялық қауіпсіздік проблемалары ғылыми зерттеу институтында дайындалған COVID-19-ға қарсы вакцина 244 еріктіге салынатынын айтты, деп хабарлайды Azattyq Rýhy тілшісі. 

Комиссия мәліметінше, коронавирус жұқтырғандардан патологиялық материал алғаш рет 23 наурызда алынған. Ал 9 мамырда атқарылған жұмыс туралы хаттама Дүниежүзілік денсаулық сақтау ұйымына жіберілген. Содан кейін қазақстандық вакцина тексерістен өтіп, кандидат-вакциналар тізіміне енді.

«Денсаулық сақтау министрлігі рұқсат берсе, қыркүйектен бастап Алматыда 44 еріктіге вакцина салынады. Бұл зерттеудің бірінші кезеңі болады. Ал қазан айындағы екінші кезеңде ДДСҰ талаптарына жауап беретін 200 еріктіге коронавирусқа қарсы қазақстандық вакцина салынады. Бұл екі сатылық тәжірибе желтоқсан айында аяқталады», - деп жазылған хабарламада.

Егер ДДСҰ клиникаға дейінгі зерттеу нәтижелерін мақұлдаса, Қазақстан салынып жатқан зауыт негізінде вакцина шығарады. Желтоқсан айында құрылысы аяқталатын жаңа зауыт жылына 60 млн доза вакцина шығаруға мүмкіндік бермек.